United hmachhawn theih zingah Lazio leh Monaco

August 7 khian UEFA Champions League playoff round draw neih a ni dawn a, he hunah hian Manchester United hmachhawn tur a chiang ang. Playoff hi August 18/19 leh 25/26-ah khelh a ni ang.

Sir Alex Ferguson hnuaiah Manchester United an hlawh­tling a, 1996 aṭanga 2014 thleng khan Europe club inelna sang berah an inlan char char. Kum 18 chhung a zawna Champions League an khelh hnuah David Moyes-a hnuaiah United chu 2013/14 season khan Premier League-ah pasarihnaah awm a, Champions League chu sawi loh Europa League-ah pawh an tel pha lo.

Tun season-ah Louis van Gaal-a hnuaiah United hi league-ah palinaah an awm a, season thara Champions League groupstage thleng pha turin United tan double legged playoff-a chak a ṭul. Playoff-ah hian Manchester United hi seeded no. 1 ni mah se an hmabak a awlsam lo a, an hmachhawn theih zingah tun season Champions League-a Arsenal petchhuaktu Monaco leh playoff thleng tura Napoli hnehtu Lazio an tel.

UCL Kalkawng

Third qualifying round-ah Shakhtar Donetsk, Ajax, CSKA Moscow, Club Brugge leh Monaco te chu seeded an ni a, an hmachhawn theih chu Young Boys, Sparta Prague, Fenerbahce, Panathinaikos leh Rapid Vienna ten a ni.

Heng team 10 aṭanga team panga hian playoff round an lut ang. Team awmsa panga Manchester United, Valencia, Bayer Leverkusen, Sporting Lisbon leh Lazio nen Champions League group stage lut tur an zawng ang.

Playoff-ah hian United, Valencia leh Bayer Leverkusen te chu seeded an ni chiang tawh a, Shakhtar leh Ajax-in an khingpui an hneh chuan seeded an ni bawk ang. Ukranian leh Dutch club ten playoff an thleng lo a nih chuan an aiawha seeded ni thei tur indawt dan chu Sporting Lisbon, CSKA Moscow leh Lazio te an ni.

United hian LKS Lodz (1998), Zalagerszeg (2002), Dina­mo Bucharest (2004) leh Debrecen (2005) te hnehin UCL qualifier hi an paltlang tawh.

Seeded hi UEFA club coefficients hmanga siam a ni.

United hmachhawn theih team 10-te chu

1. Sporting Lisbon (UEFA ranking - 33) : Portugal league sang bera pathumna an ni a, champion Benfica leh Porto hnuaiah an awm. Tun season khan Champions League-ah Chelsea chu an khelmual leh khualmualah an hneh lo ve ve a, UCL aṭanga an tlak thlak hnuin Wolfsburg hneh loin Europa League aṭangin an tla nghal.

Lisbon hi Portuguese Cup champion an ni a, Manchester United nena sawi zawm William Carvalho khelhna a ni.

2. CSKA Moscow (UEFA ranking - 34) : Russian club hian kumin Champions Lea­gue-ah Manchester City chu Etihad Stadium-ah an hneh a, an khelmualah an draw zui bawk. Amaherawhchu Moscow hi group table mawng­phahah an awm a, league-ah Zenit St Petersburg tluk loin pahnihnaah an awm.

3. Lazio (UEFA ranking - 40) : Lazio-in qualifying round thleng turin Napoli an hneh a, Coppa Italia final an thleng bawk.

4. Club Brugge (UEFA ranking - 51) : Belgium regu­lar season-ah table hmahruaitu ni mah se playoff-ah Gent hneh loin pahnihna an ni. Barcelona youth system chhuak Victor Vazquez chu midfield khaikhawmtu a ni.

5. Monaco (UEFA ran­king - 68) : Champions Lea­gue aṭanga French club hnawh­chhuaktu chu finialist Juventus an ni. United tana che fuh lo Radamel Falcao-a'n club dang a zawm a nih ngawt loh chuan Colombian forward hian United barakhaih theihna hun ṭha a nei ang.

6. Young Boys (UEFA ranking - 69) : Kum 2010 hnua a vawi khatnan Young Boys-in Champions League khelhna hun ṭha a nei a, Swiss Super League-ah champion Basel hnuaiah chiah an awm.

Young Boys hian Europa League last 32-ah Everton chu aggregate-ah 7-2 in an hneh lo.

7. Sparta Prague (UEFA ranking - 72) : Czech champion Viktoria Plzen-in 'champions route' an zawh a, Sparta Prague hian 'league route' an zawh a ṭul phah. Europa League group stage paltlang lo Prague tan UCL kawng a la thui hle.

8. Fenerbahce (UEFA ran­king - 75) : Fenerbache-in champion Galatasaray point thumin an pha lo a, UCL kalkawng a har sawt. Turkish club hian team lian barakhaih turin Turkey legend Emre, Brazilian playmaker Diego leh Liverpool forward hlui Dirk Kuyt an kawl.

9. Panathinaikos (UEFA ranking - 100) : Greece-ah Olym­piacos an champion a, a hnuaia team paliin Superleague an khel mek. Panathinaikos hi a sang berah an awm a, third qualifying round khel turin an tlin ngei a rinawm.

Greek club-ah hian United keeper hlui Luke Steele a khel a, Europa League-ah khan United player thar Memphis Depay-a'n Greek club lamah hian goal a khung.

10. Rapid Vienna (UEFA ranking - 121) : Austrian club Rapid Vienna hi an league-ah Red Bull Salzburg tluk loin pahnihnaah an awm a, tun season ṭan tirh khan Europa League qualifier an paltlang zo lo.