Real Madrid coach thar Benitez
Nimin tlai dar 4:30 khan Santiago Bernabeu Royal Box-ah Rafael Benitez chu kum thum chhung Real Madrid enkawl tura lak luh a ni. Rafa hi manager atana nemgheh a nih hnuah press room-ah media a hmachhawn zui nghal.
Real Madrid manager thar chuan youth team enkawla a coaching career a lo ṭanna hmuna a kir leh thei chu a lawmzia sawiin, "Ka in ngeia ka lo haw leh thei hi a lunglenthlak hle a ni," a ti.
Player a nih laia Real Madrid B team tana khel ṭhin Benitez chuan, "Dik taka chuan sawi tur pawh ka hre lo, in tan hnehna changin hlawhtlinna tam tak kan tem ho ngei ka beisei a ni," tiin mittui parawl chungin a sawi.
Real Madrid chuan an coach thar hi football kalhmang hria leh football lama mithiam bik, rim taka hnathawk ṭhin, khawvela coach ṭha ber pawl tiin an website-ah an tarlang a ni.
Napoli a thlah
Spanish manager Rafa hian kum hnih chhung Serie A club Napoli a enkawl a, a mimal website-ah Italian club leh supporter-te thlahna a tarchhuak.
"Sawmna duhawm bik tun hnaiah ka tawng a, ka thutlukna min hriatthiampui ngei ka beisei. Hmahmawh taka thil tihfel ngai a awm avangin duh angin thlahna hun ka hmang thei lo a, pawi ka ti hle a ni," tiin Benitez-a'n a ziak.
"Kum hnih chhunga Naples-a ka hun tawn hi theihngilh theih a ni tawh lo. Naples hi khawpui mawi tak a ni a, a mipui chengte an fel bawk. Kan inṭhen takah chuan ka chunga inṭhatna hi ka theihngilh ngai lo ang. Thil tam tak min tawntirtu club chungah hian ka thinlung takin ka lawm a ni," tiin Napoli chungah a lawm tih a ziak.
Rafa hian Napoli hi Coppa Italia-ah a champion pui nghal a, amaherawhchu Pathianni khan Lazio 4-2 a an hneh loh avangin table-ah panganaah an awm a, season tharah Champions League an khel dawn lo.
Cheque ziah loh
Real Madrid president Florentino Perez hian manager thar apiang hi 'cheque sign vek tawh pawisa zat ziah si loh' a pe ṭhin.
Real manager ni tawh Vicente Del Bosque, Carlos Queiroz, Camacho, Luxemburgo, Manuel Pellegrini, Jose Mourinho leh Carlo Ancelotti ten an season khatnaa transfer-a an pawisa hman zat kha euro maktaduai 800 a tling pha hial.
An player lak luh zingah Luis Figo, David Beckham, Samuel, Jonathan Woodgate, Michael Owen, Sergio Ramos, Robinho, Cristiano Ronaldo, Karim Benzema, Kaka, Xabi Alonso, Angel Di Maria, Mesut Ozil, Luka Modric, Gareth Bale te an tel avangin pawisa an hman tam hi amak lo.
Target No. 1 - De Gea
Thawhlehni zan khan Real president Perez leh Benitez ten season thar thlirlawkin chawhlui an kil dun a. Real player lak tura sawi rik zin ber chu Manchester United keeper David de Gea a ni.
Spanish keeper hi United nen contract thar chungchangah inremna an la siam lo a, amaherawhchu English club hian awlsam taka De Gea hi chhuah an tum loh avangin Real tan a awlsam dawn lo. Chutilrualin Spanish club hian an player duh an hlah ngai meuh lo thung.