Ancelotti-a'n Milan a hnar
Italian manager Carlo Ancelotti-a'n a club hlui AC Milan sawmna a hnar thu Thawhlehni khan a tichiang.
Real Madrid manager hlui Ancelotti leh AC Milan general manager Adriano Galliani te chu kar liamta khan Madrid-ah an inbia a, uluk taka a ngaihtuah hnuin Ancelotti chuan Thawhlehni zan khan Galliani hi telephone hmanga biain Milan sawmna a hnar thu a hrilh.
AC Milan chuan, "Carlo Ancelotti chuan season thara Rossoneri first team a enkawl theih loh thu Milan a hrilh," tiin thuchhuah an siam.
Kum 55-a upa Ancelotti hian a hnung na enkawl turin kum khat chhung a chawl dawn a, tunkar hian Vancouver-ah zai a ni ang.
Ancelotti chuan, "Ka chunga rinna an nghah avangin AC Milan chungah ka lawm a, ka club hmangaih em em hi hnar harsa hle mah se chawlh ka mamawh a ni. An kal zelna tur atan duhsakna ka hlan e," tiin twitter-ah a ziak.
Italian manager hian Chelsea, Paris Saint-Germain leh Real Madrid te nomawi a chawi pui hma khan AC Milan hi kum riat a enkawl a, Champions League-ah ṭum hnih a champion pui bakah Serie A title vawi khat a lakpui bawk.
Ancelotti hi a inkhelh hun laiin midfielder a ni a, Milan hi European Cup (UCL hming hmasa)-ah ṭum hnih a champion pui a, Serie A-ah vawi hnih a champion a, record a neih ṭhat avangin Milan khawpuia hming langsar ber zing ami a ni.
Milan-in an duh ber an neih theih tak loah chuan manager thar an zawn a ngai dawn a, coach Filippo Inzaghi ṭanglai bakah player leh coach hlui Clarence Seedorf te chu rinkai an ni a. Sampdoria coach aṭanga inhnukdawk Sinisa Mihajlovic leh youth team coach Cristian Brocchi te hming lam rik a ni bawk.