Costa hi Chelsea-ah a hlim - Mourinho

Chelsea manager Jose Mourinho chuan a striker chhuanvawr Diego Costa chu Chelsea-ah a hlim thu leh Premier League champion club hi chhuahsan tumna aneih loh thu a sawi.

Tun season ṭan dawn khan Spain international Costa hian Atletico Madrid aṭangin Stamford Bridge a zawm a, a season khatnaah League goal 20 khungin a team te a champion pui nghal.

Report ṭhenkhatah chuan Costa hi London-ah a hlim loh avangin Spain-ah kir leh a duh tih thawm a lo awm leh hman tawh. He thu leng vak hi chhangin Mourinho chuan, "Costa chhuah a tum tih thuthang lo awm hi ka hriatin kan nuih a za zawk hial. He hmunah hian ani hi a hlim em em a, nitin mai hian hmasawn duhna thinlung nen training a zawm ṭhin avangin hmabak eng tak kan nei mek zawk a ni. Costa hi a chhuak dawn lo a, kan hnehah a la cham zel ang," tiin a sawi.

A striker duhlai chanchin sawi chhun­zawmin Mourinho chuan, "A ke rek hliam vangin Costa hian EPL a kan match hnuhnung ho pawh a khel thei lo tawh a, tunah chuan a hliam dam tawhin a inkhel leh thei tawh. Mahse, minute 90 chhung khel tur chuan hun ala duh deuh ang, atan chuan minute 40 khelh kha a tawk rih a ni," tiin a sawi.

Thawhlehni khan Chelsea hian Sydney FC chu 1-0 in an hneh a, he inkhelah hian Costa pawhin minute 40 chhung a khel a ni.