Xavi hian UCL nomawi nen thlah a phu - Iniesta
Barcelona player pawimah Andres Iniesta chuan season thara Qatar lam pan tur Xavi chu Champions League nomawi nen ngeia thlah a duh thu sawiin, Barca player ropui chuan ropui taka thlah a phu a ni, a ti.
Kum 35-a upa Xavi hian Barca tana a game hnuhnung ber chu June 6-a Champions League final Juventus nen an khelh hunah a khel tawh dawn a, Barca hi an champion leh thei a nih ngat chuan Xavi atan Champions League nomawi a vawi li chawi na tur a ni ang.
Spain leh Barca tana Xavi team-mate Iniesta chuan, "Ka tan chuan Xavi hi player ṭha ber a ni a, ka inkhelhpui theih piahlama ka ṭhian ṭha tak a ni hi ka inchhuang hle a ni," a ti.
Iniesta chuan trophy chawi ngei a duh thu sawiin, "Xavi tan a hun hnuhnung hman dan duhawm tak a nih dawn bakah club tan pawh a lawmawm dawn hrim hrim a ni," tiin Champions League-a champion leh ngei a tum ruh hle.
Barcelona hi tun seasonah manager thar hnuaiah an che ṭha hle a, Copa Dely Rey bakah La Liga title chawi tawhin treble champion thei dinhmunah an ding mek.
Final-a an khingpui tur Juventus pawh treble champion thei tho an ni. Serie A title bakah Coppa Italia te an chawi tawh a ni.
Kum 17 chhung Barcelona tana khel tawh Spanish midfielder ropui Xavi hian season tharah kum thum chhung cham turin Qatar club Al Sadd a zawm dawn a, Barca tan a khelh chhung hian trophy 24 zet a chawi tawh a ni.