Liverpool a cham zel tur Rodgers
Brendan Rodgers chuan season tharah Liverpool a enkawl chhunzawm zel dawn.
Thawhlehni khan club chairman Tom Werner leh FSG executive Mike Gordon te nen inbiakna neiin season an hman zawk tak an thlir kir bakah season thara an hmasawn theih dan turte ngaihtuah tel bawkin Liverpool chu Rodgers-a'n la enkawl chhunzawm zel se tih chu an thutlukna a ni.
Kum 2012 June 1 aṭang khan Rodgers hian Liverpool enkawl ṭanin a season khatnaah chet ṭhat pui lo mahse a season hnihnaah erawh chet ṭhat puiin Premier League-ah point 84 hmuin pahnihna a nihpui a, champion Manchester City chu point hnih chauhin an phak lo nghe nghe. Kum 24 hnua a vawikhat nan EPL champion nomawi an chawi teuh hle a ni.
Beiseina sang tak nen season thar an thlir a, kum 2014-15 season-ah sum tam tak sengin Rickie Lambert, Adam Lallana, Emre Can, Lazar Markovic, Dejan Lovren, Divick Origi, Javier Manquillo, Alberto Moreno, Mario Balotelli te an lalut. Mahse, beisei angin season an hmang lo.
An striker chhuanvawr Luis Suarez chu Barcelona-ah an hralh hnuin Liverpool hi Champions League aṭanga an tlak bakah Europa League aṭang pawhin an tla chhunzawm nghal. FA leh Capital One Cup-ah te semifinal thleng ve bawk mah se final thleng zo lo ve ve in an beisei ang result an nei pha lo.
Tun season liamtaah khan point 62 hmuin Premier League-ah parukna an ni pha chauh a, champion Chelsea nen point 15 zetin an inthlau.
Tun season kharna inkhelah Stoke City chu 6-1 ngawta an hneh loh bawk avangin fan te rilru a na in an manager hi bang tur a duh tu pawh an tam hle a, a bang nghal mai tur a ngaih pawh a ni hman tawh.
Liverpool a enkawl chhunzawm dawn leh dawn loh an zawhna pawh Liverpool manager Rodgers hian, "Club neituten chhuak tura min tih chuan ka chhuak ang," tiin a lo chhang hial tawh. Mahse, mi tamtak rindan leh beisei loh danin Liverpool hian Northern Ireland pachal Rodgers-a hnuaiah hmasawn an la tum chhunzawm dawn a ni.