A zawna vawi thum champion duh Ozil

Arsenal playmaker Mesut Ozil chuan a zawna FA Cup vawi thum champion nih a duh thu a sawi.

Inrinni zan khan Gunners hian a vawi 12 na atan FA Cup chanpion nomawi an chawi a, record siamin English Club zingah anni aia champion hnem an awm lo. Nikum khan Arsenal hian nomawi hi an lo chawi tawh bawk a, kuminah a zawnin an chawi a ni.

German international chuan champion leh a chak zia sawiin, "Ka hlim tak zet zet a ni. Season hnihna ka hmang chauh chungin champion nomawi pahnih kan chawina a ni ta. Inelna kan hmachhawn zawng zawngah hian hnehna chan vek kan duh a, mahse keini ang tho hian team dangte pawhin chak an duh ve tho avangin a harsa ṭhin. Nakumah chuan FA Cup hi a vawi thum nana chawi leh ngei ka duh a, hemi ni lo champion nomawi dang pawh chawi turin kan ṭhat tawk avangin a tam thei ang bera champion ka duh a ni," tiin a sawi.

Sawi chhunzawmin Arsenal midfielder chuan, "Hliam vangin hun rei tak ka inkhel thei lo a, ka hliam a dam hnuah pawh beisei angin ka fit mai thei lo bawk. Mahse, ka hliam a dam fel a ka inkhelh leh theih tak tak hnuah ka theihna pholan na hun ṭha ka nei leh a, ka dinhmun ṭhat loh lai pawh a ka chunga rinna nghat tlat tu kan manager Arsene Wenger chungah pawh ka lawm hle a ni," tiin an manager chunga a lawmthu a sawi bawk.

Kum 2013 khan Spain club lian Real Madrid aṭangin Ozil hian North London club Arsenal hi a zawm a ni.