FIFA President aṭangin Blatter a bâng

Kar hmasa lawka a vawi ngana atana FIFA president nihna chelhtu Sepp Blatter chuan Thawhlehni khan a hna aṭanga a ban thu a puang.

Rin loh taka FIFA pre­sident aṭanga a ban thu puangtu Blatter chuan, "Mawhphurhna ropui tak chelh tura thlan tlin ka nihna hi mi zawng zawngin an pawm lo niin ka hria," tiin kum 17 chuang FIFA president lo ni tawh chuan a ban chhan a sawi.

Kum 79-a upa Blatter chuan a rang thei ang bera amah thlaktu tur thlanna FIFA congress neih thuai a nih tur thu sawiin president thar thlan a nih hma chuan president hna hi ala chelh rih ang.

Engvangin nge

Blatter a ban?

Tunhnaiah FIFA hi eiruk leh thamna sum lak thubuai vangin a hmingchhe hle a, president thlanna neih a nih hma lawk khan official pasarih chu US department of Justice thupek angin Swiss Police te'n an man hial. Hei mai hi a ni lo, Swiss Court chuan 2018 leh 2022 World Cup thlen dan chungchangah thil dik lo a awm nia ngaiin FIFA headquarters, Zurich khawpuia mi chu a chhui chiang mek bawk.

Hetiang boruak tehnuai a nih avang hian FIFA president inthlanna neih a nih hma hauh khan Blatter hian inhnukdawk tura nawrtu a ngah hle a, heng zingah hian United Kingdom prime minister David Cameron chu hming langsar pawl a ni nghe nghe. Heti chung hian Blatter a ding nawn a, vote ngah khawmualpui Asia leh Africa te'n an thlawp ṭhat avangin beisei ang ngeiin a tling nawn.

Mahse, Thawhlehni khan FIFA-in chanchin duhawm lo dang a neih belh a, chu chu FIFA general secretary Jerome Valcke-a'n South Africa-in 2010 World Cup an thlen theih nan khan thamna sum dollar maktaduai 10 a la nia sawi a awm hi a ni. Blatter hi US Department of Justice-in a chhui chiang mek nia sawi a lo ni lehzel nen buaina tih punlun belhchhah ai chuan ban a thlang ta zawk niin a lang.

Tunge president ni ta ang le?

Sepp Blatter lo khing tawhtu, tlin inbeisei loh vanga second-round voting aṭanga inhnukdawk Prince Ali bin al-Hussein chuan FIFA president ni tura a inpeih thu a sawi.

Kum 39-a upa Jordanian prince chuan, "Football tana hnathawk tur hi chuan engtiklai pawhin ka inpeih a, ka tan chuan chu lo liama hna ropui zawk chu a awm lo. Chutiang rilru chu kan put ṭheuh a ngai a ni.

Europe-a football thuneitu sang ber, Blatter duh lo langsar tu zinga mi UEFA president Michel Platini hming pawh lam rik a ni a, a ding a nih ngat chuan a tlin chance a sang viauin a rinawm.

France international hlui David Ginola pawh inthlan hmasa zawka a inhnuhdawh hnuin a lo lang veleh a, mah se ani erawh a tlin a rinawm loh.