Football khawvel ngaihdan

Europe khawmualpuia football thuneitu sang ber UEFA president Platini chuan, "Thutlukna siam harsa tak a niin ka ring a, thutlukna huaisen thlak tak leh thutlukna dik tak a ni," tiin Blatter-a'n banna thu a ti tlu chu lawmawm a tih thu a sawi.

England Football Association chairman Greg Dyke chuan, "Football tan chanchin lawmawm a ni a, kum tam tak kal ta ah khan lo thleng tawh hial zawk se duhthusam a ni. FIFA hi a bul ṭhut aṭanga chhuichhuah vek a ngai a, nakin zelah pawh pawl langtlang leh thianghlim a nih a ngai a ni," tiin Blatter a bang chu lawmawm a tih thu a sawi.

Portugal international hlui leh presi­dential election aṭanga inhnukdawk ta Luis Figo chuan, "FIFA leh football khawvel tan ni duhawm tak a ni. Kan beisei 'inthlak danglamna' chu vawiinah hian a thleng ta. Tunah chuan khawvel football a lo thianghlim zawk leh FIFA rorelna a zalen zawk theihna turin hma kan lak tlan a ngai a ni," a ti.

Blatter ringtu a fanu

Khawvel pumpuiin an dem rawn luai luai laia Blatter ring tlattu chu tudang ni lo in a fanu a ni.

Blatter-a fanu Corinne Blatter chuan a pa chu thamna sum la chi a nih loh thu sawiin, "A pawisa hlawhchhuah zawng zawng hi rim taka a thawhchhuah vek a ni. President thawkrim leh taima tak a ni," a ti.

Corinne chuan, "Ka lungngaih rualin ka thawveng huaiin ka hria. Tuna ka duh ber chu ka pa leh khawvel football tan tuna boruak ṭha lo awm zawng zawng hi kiang tawh se tih hi a ni. Chung zawng zawng ai chuan kum 40 chuang football tana hna a lo thawh tawh ropui tak hi football khawvel hian theihnghilh lo hram rawh se," tiin a sawi bawk.

Blatter-a fanu chuan a pa chu chhan tlatin, "Tuna banna a thehluh chhan hi tunhnai buaina a fihlim loh vang lam a ni lo. A chhungte hi min dah pawimawh ber ṭhin a, min venhim duh vanga he thutlukna hi siam a ni. Ka pa hi mi rinawm tak a ni a, a nun pum football tan a hlan a ni," a ti.

Engtinnge 2018 leh 2014 World Cup?

FIFA buaina a sawi hlawh ber pawl chu 2018 leh 2022 World Cup thlen dan chungchang hi a ni. Russia leh Qater te World Cup thlen turah hian thamna sum a che vel nia ngaiin Swiss Court chuan an chhui chiang mek.

2018 World Cup thlen tum zinga mi England thlen dilna buaipui ber tu Simon Johnson chuan, "World cup thlengtu thlan an nih danah hian thil kalpui a nih dan chiang leh fiah taka tarlan ka duh a, engkim langtlang kan phut a ni," a ti.

Johnson chuan Swiss Court-in an rinhlelh anga dik lo a awm a nih ngat chuan World Cup thlengtu tur thlan ṭhat a ngiat thu a sawi a, 2018 Russia World Cup erawh tihdanglamna hun a awm tawh lo nia a ngaih thu a sawi.

Hetihlai hian Johnson chuan FA chairman Greg Dyke-a lo sawi tawh angin Qatar World Cup chu hnuhdawhna chance a sang hlea a hriat thu a sawi.

Qatar Football Association president Sheikh Hamad bin Khalifa Al Thani-a'n ngaihdan dang a nei thung. Al Thani chuan, "FA chairman Dyke-a hnena ka sawi duh chu court-in a tih tur te fel taka a tih hi lo nghak sela, alo intiam tawh angin 2022 FIFA World Cup thleng thei tur England chu ruahman mai rawh se," tiin tuna lo ṭawng vakin awmzia a neih loh thu a sawi.