Kum sarih hnuah Ivanovic-i'n semifinal lut leh ta

A vawi hnih nana French Open champion nih tum Ana Ivanovic chuan kawng dik a zawh zel a, semifinal thleng turin a khingpui Elina Svitolina chu 6-3, 6-2 in a hneh. Final lut tur chuan Czech Lucie Safarova a paltlang leh phawt a ngai ang.

Kum 2008 Roland Gaross-a a champion hnuah Ivanovic hian Grand Slam hrang hrangah semifinal ala thleng leh ngai lo a, kum sarih hnua a vawikhat nan quarterfinal a paltlang leh na chiah a ni.

Quarterfinal inkhelah Ivanovic hi a khel ṭha hle a, Svitolina service hmasa ber chu a chhuhsak bakah game linaah Ukrainian Svitolina sevice laksak lehin minute 40 chhung lekin set khatna a la fel der tawh. Set hnihnaah pawh Serbian Ivanovic hian inkhel a thunun chhunzawm zel a, a service hmasak bakah Svitolina sevice chu vawi hnih chhuhsak lehin awlsam angreng takin semifinal a lut.

A zawna Grand Slam vawi 17 zet semifinal thleng tawh lo Ivanovic chuan semifinal a thleng leh ta chu a mak a tih thu sawiin,"A nihna takah chuan ka zak ve deuh ṭhin, ka beisei leh duh anga ka khelh theih ṭhin loh avangin mipuiin ka chungah rinna an nghat ngam tawh lo pawh hi a awm ka ti khawp mai. Tunah chuan hmalam a eng leh tawhin ka hria, hun harsa ka paltlang mek e. Ka chak vang khan ka lawma, ka muhil thei lo hial a ni," tiin a lawm thu a sawi.

Tsonga a kal zel

A vawi khat nana Grand Slam champion nih tum Jo-Wilfried Tsonga chu an rama inkhel a ni bawka, a che ṭha chhunzawm zel. Quarterfinal thleng turin Tsonga hian hna hautak tak mai a hmachhawn a, harsa lutuk loin Kei Nishikori lakah set khatna leh set hnihna chu 6-1, 6-4 in la mah se set thumna leh set lina chu 4-6, 3-6 in a hloh ve thung. Set hnuhung berah Nishikori-a service chhuhsakin 6-3 in hnehna a chang hram a ni.

Tun ṭum hi Tsonga-a'n Grand Slam semifinal vawi ruk a thlenna chiah a ni a, tunhnai kum thum chhunga French Open semifinal a vawi hnih thlenna chiah a ni bawk. Quarter final inkheng danga Roger Federer hnehtu Stanislas Wawrinka nen final luh an inchuh leh ang.

Kum 1983 a Yannick Noah a champion kha khawtual mi an champion hnuhnun ber a nih tawh avangin French mipuiin nghakhlel taka an lo thlir a ram leilung fa champion lai kuminah hian thlir an inbeisei ve tawh hle.

Federer a ṭang zo ta lo

Kum 33 a upa a ni tawh a, a thiam la theihnghilh lo mah se Roger Federer hian inkhel zawn rei turin tharum a ngah tawk tawh lo deuh niin a lang.

Tunhnai Grand Slam tournament-ah vawi li an inhmachhawnah Stan Wawrinka hian Federer hi hneh ngai lo mah se tunah chuan a hun a thleng ve ta. Kum 30-a upa Wawrinka hian semifinal lut turin Federer chu 6-4, 6-3, 7-6, (7-4) in a hneh.

Federer hian set khatna a game thumnaah a service a hloh bakah set hnihna a game sarihnaah a service a hloh leh bawk a ni.

Swiss tennis super star Federer chuan, "Chak lo mah ila, chawlh ka la tum lo. Wawrinka khan a khel ṭhat avangin chak a phu. Ka beidawng lo a, Grand Slam lo awm leh tur Wimbledon atan ka inpuahchah leh nghal ang. Mitinin ṭhatna leh khelh thiam bikna kan nei ṭheuh avangin ka tan chuan Wimbledon khelh hi a nghahhlelhawm tawh zawk a ni" tiin Grand Slam tournament lo awm leh tur a thlir nghal. Federer hian Wimbledon champion nomawi vawi sarih zet a chawi tawh.