Mizo hlanga khel Aizawl leh Gokulam an inhnehtawk
I League-ah Aizawl FC-in Thawhlehni zan khan khualmuala an match hmasa ber an khel a, EMS Stadium, Kozhikode-ah Gokulam Kerala nen 1-1 in an inhnehtawk. Mizo club hian December 8, Pathianni zan dar 7:00 hian Namdhari an hmachhawn leh ang.
Bul ṭantute
Aizawl FC coach Victor Lalbiakmawia'n ṭum dang ang thoin squad a siksawi tam lo. I League match hmasa bera Dempo nen an inhnektawk ṭuma bul a ṭantir Lalhriatpuia chu bul a ṭantir a, SC Bengaluru nena bul ṭan Lalrinzuala a awl leh thung.
Player 10 dang erawh a zawna a vawi thum nan starting eleven-ah an awm. Goalkeeper-ah Lalhriatpuia a awm a, defence laiah Lalchhawnkima leh Lalhrezuala te inkawpin H. Lalrempuia leh Lalfelkima te mual sirah an awm.
MPL11 best player Lalthankhuma (TK-a) chuan defensive midfield hna rawn chelh lehin Zothanpuia leh Lalawmpuia te nen mual lai an luahlum. Tlarhma lamah Hriata thlawp turin Augustine Lalrochana leh MPL11 top scorer Lalbiakdika te an awm bawk.
Lawm a kim lo
Aizawl FC-in Mizo hlangin an khel a, team ṭha Gokulam lakah bul an ṭan ṭha zawk. Minute 13-na lekah BD-a corner pet chu Hriata'n a tauh goal nghal. Farkawn/Republic Veng tlangval Hriata hian SC Bengaluru an hneh ṭumin RG Stadium-ah goal ṭha bik a khung a, match zawnin goal a khung.
Mahse, minute 22-naah MPL11 best goalkeeper Vanlalhriatpuia chu hliam vangin Joel B. Lalramchhana'n a rawn thlak. Hriatpuia hi damdawi in panpui a ni a, X Ray aṭanga a lan danin a ban ruh tê zawk a tliak. Tun season-ah Kawnpui tlangval hi a inlan theih a rinawm tawh lo.
Aizawl FC-in Augustine hmangin Gokulam tlarhnung an rum ṭhaih a, chutihrualin Gokulam forward VP Suhair leh Martín Cháves te Mizo club tlarhnung tan an hnawksak viau. Coach Victor-a'n tlarhnung rem phui ṭha mah se midfielder Rishad-a'n box pawn aṭangin kawh zetin a pet goal.
First half injury time-ah Kerala-in si phurh an sut a, heti chung hian Aizawl FC-in hmahruai lehna hun an nei tho. Hriata'n goal hnihna khung theihna remchang a hlah.
Second half-ah mualneitu leh squad chhah zawk Gokulam-in an nawr na a, Suhair leh Chaves te box pawn aṭangin an khung lo. Michael Soosairaj pawh a hnawksak a, mah se Lalchhawnkima leh a hote an ṭang khawng ve tlat a, 1-1 in inkhel a tawp.
Result chhia a ni lo
Aizawl FC coach Victor Lalbiakmawia chuan, "Kan khel chhe loin ka hria. Players mal han innghahna bik kan nei lo a, team anga kan ṭanrual hi a pawimawh. Kan fighting spirit sawi hmaih theih a ni lo. I League team ṭha ber pawla mi away-a khel chungin kan chelh thei a. Draw hi result chhia a ni lo," tiin a sawi a, hmasawnna tur ṭhahnem tak a hmuh thu a sawi tel bawk.
Gokulam Kerala hi Aizawl FC nen an budget a inthlau a, foreigner bakah Indian player ṭha nena inelna hmachhawn an ni. Mizo club an hmachhawn ṭum pawh hian Aizawl FC aṭanga an lak R. Ramdinthara chu bench aṭangin a lut.
Bench aṭanga lut dang Salam Ranjan Singh chu ISL club hrang hrang bakah India tan pawha khel tawh a ni a, Soosairaj pawh 2019–20 season-a ATK-in nuai 90 senga an lakluh a ni.