Penalty Shootout-ah Melbukin Armed Veng an hneh

GIG Motors Inter Village Football semifinal lut turin Melbukin football thiam veng Armed Veng an hneh. Nimina quarterfinal inkhelah hian hun pangngaiah goal a lut a, penalty shootout-ah F. Lalrozara enkawl Melbuk 5-4 in an vannei ta zawk.

Melbuk hian December 9, Thawhṭanni tlai dar 3:00 hian semifinal-ah Kolasib Town Jt an hmachhawn dawn a, Aizawl khaw pawn team-in final an khel dawn tih a chiang.

RG Stadium-a inkhelah hian goal chance a tam lo a, Armed Vengin minute 10 pelh hretah keeper Andrew Lalhmingliana chu hliam vangin an chan. Lalramchullova'n hliam vangin player pawimawh Lalfakzuala leh Eric Lalsangzuala te a chhawr thei tawh lo bawk.

Melbuk inkhelah an chungnung zawk a, chance ṭha insiam an harsat a, bench aṭanga lut keeper HF Lallawmawma tan hna harsa a awm lo. Chutihrualin inkhel tawp lamah erawh Melbukin an nawr bet a; Lallawmsanga, Ephraim Lalremtluanga leh substitute Lalthanzuala te vanneih ṭum ni se goal an khung ngei ang.

Rozara hote an vannei lo a, keeper Awmawma'n LS-a a titlu chungin referee-in penalty a pe lo. Hun pangngaiah goal a lut lo a, penalty shootout-ah Armed Vengin keeper Andrew awm loh an tuar. Melbuk keeper Malsawmtluanga'n Lalrintluanga penalty pet a dang a, Melbuk erawhin penalty khung vekin Ephraim-a'n keeper bumin chakna goal a khung.