Nistelrooy-a hoin Leicester an chak nghal

Manchester United duh loh Ruud van Nistelrooy-a'n Leicester City a enkawl hmasak berah a chakpui nghal a, Thawhlehni zan khan Premier League inkhelah West Ham chu 3-1 in an hneh.

Foxes tan Jamie Vardy, Bilal El Khannouss leh Patson Daka ten goal khat ṭheuh an khung a, hun pek belha Niclas Fullkrug goal khung chu Hammers tan awmze nei lo mai a chang zo.

Leicester-in hnehna an chan avangin relegation zone an hlat leh ta sawt a, table-ah 15-na dinhmun luahin, 18-na china awm Wolverhampton Wanderers chu point liin an hlat - match khatin an khel tam thung.

A goal hma

Leicester-in tla thei dinhmuna an din reng avangin coach Steve Cooper an ban a, a hmun ruak luah turin, United-in assistant coach atana an chhawr zui loh Nistelrooy an la lut.

Dutch coach hian Inrinni khan Brentford laka 4-1 a an tlawm lai inkhel chu a hmunah a en a, Pathianni khan club hi training a neihpui ve chiah - ni hnih chiah a enkawl hman a, danglamna hmuh turin a awm nghal.

Inkhel ṭan aṭanga second 98-na lekah veteran striker Jamie Vardy chuan goal hmahruai a khung a, video assistant referee (VAR) hmanga a offside leh offside loh en a nih hnuah Vardy goal pawm a ni a, King Power Stadium thawm pawh a ṭha ve leh ta!

Foxes vanneihna

Leicester-in goal khung hmasa mah se, Hammers-in na takin an nawr let a, Foxes goalkeeper Mads Hermansen-a chet ṭhat zan an tawn avangin an vannei tawk lo - an chance neih an hlah hnem malh malh hle.

Danny Ings chuan uiawm takin post a tauh per a, Jarrod Bowen-a khung ngei tur nia ngaih pawh Hermansen hian vawi hnih ngawt ṭha zetin a dansak. Chawlhlawk hman zawh hnu lawkah Hammers hian si phurh sutah an inngai hial a, mahse, goal luhna kawngah Tomas Soucek a lo foul avangin pawm a ni lo.

A hnu lawkah Leicester-in Hammers an hrem zui a, El Khannouss chuan Kasey McAteer-a siamsak chu Premier League-a a goal hmasa ber ni turin a khung zui a, 2-0 a ni.

Mualpho khuhna

Goal an khung hnuah Foxes an phur laklawh - Wilfred Ndidi hun ṭha neih chu West Ham keeper Lukasz Fabianski chuan a dansak a, Leicester defender Conor Coady chuan Crysencio Summerville-a khung ngei tura lang chu line aṭangin a pet chhuak bawk.

Leicester tana Bobby de Cordova-Reid-a khung chu VAR hmanga pawm ni lo mah se, minute 90-naah Daka chuan an goal thumna a khung ve leh a, hun pek belha Fullkrug-a goal khung chu Hammers mualpho zualpui khuhna chauh a ni.

Nistelrooy-a'n 'style' aia 'result' a ngaih pawimawh tur thu sawiin, "Football romantic ka ni lo" ti mah se, Hammers lakah Foxes 'fighting spirit' kha hmuh turin a awm leh ta a, hetiang reng a nih chuan Foxes fans-ah a tla na zel ang.