Title fight hmachhawn tur an hriat kim ta
Zudio LPS Pro Fight 2024 chu a hmawr bawk nan zan khat chiah inhnek hmabak a awm ta - Thawhlehni zan khan title fight hmachhawn thei tur zawnna 'Final' bakah Women's Challenge Fight chu hlawhtling taka neih a ni.
Thawhlehni zan LPS Arena, Falkland Venga hun hmanah WBC Youth bantamweight world champion Laldinsanga chawimawi nan champion kawnghren nen pho chhuah a ni a, mipui lawm a hlawh hle.
Title Fight hmachhawn tura tling te tukin hian LPS Office, Zarkawtah an inbuk dawn a, zan dar 8:00-ah LPS Auditorium-ah an puala hun hman zui tur a ni a, an inchona sawi chhuakin hmaichhanah an intawng ang.
Women's Challenge Fight
Bantamweight: Lalbiaknii leh L Vanlalduatsaingi te an inhnek tawk takzet a, judge pahnih ten Biaknii an chak tir laiin pakhat erawhin Duati a chak tir thung. Mizorama gold medal 12 la tawh kum 19 mi Duati'n October khan Mizoram Championship, Hnahthialah a ngam lo tawh bawk a, a vanneih hun a la herchhuak thei rih lo.
Lightweight: Rudy Lalhmingmuani chuan Rebecca Lalfakawmi lakah boxer ṭhami a nihna a lantir a, round tin la vekin chiang takin a hneh. A tir aṭanga a tawp thlengin an inhnek tawk lo deuh a, Salem Veng boxer-in rang taka a vei lam a chhuah thin a hmang thiam a, harsatna a tawk lo.
Title chuh tur zawnna
Bantamweight Omega Lalramdina'n mahni inveng tak chungin a khel a, amah ang bawka inveng thiam - Eric Lalthangkima a hneh hram. Judge pakhatin 39-37-in kum 18 mi Darlawng boxer pe hnem mah se judge pahnihin 39-37 ve vein an chaktir a, hnehna ban a phar rualin a lawmzia lantir nan chhuatah a bungbu a, a thlen chin sang a tih thu sawiin "Ka phu lo, ka lawm em em a ni" a ti.
Welterweight: National Games silver medal la tawh Lallawmawa'n Venghlui rawlthar Zoremsanga lakah judge pakhatin round tin a pe vek a, judge pahnihin 39-37-in an chaktir a ni. Pro Fight-a a tel hmasak berah champion nghal thei turin kum 22 mi Tuipui tlangvalin hmabak pakhat chiah a nei tawh - Zirtawpni zanah champion lai Lalruatzela Hauzel nen title inchuhin an inhmachhawn dawn a ni.
Middleweight: F. Thangliana'n thahrui leh tharum a neih ṭhat chakpui lehin a tirah bet zawk mah se C. Lalduhawma lakah fiahna pawimawh a pal tlang a, judge pahnihin 39-37-in an chaktir a, pakhatin 39-37-in lehlam a pe hnem ve thung a ni. Title chuh tur zawnna semifinal-ah Electric Veng Lunglei boxer hian tun ang bawk hian round hnuhnung lamah John Lalruatsanga nawr hnehin a chak tawh a, nikum title fight-a a tlawmna chhang let turin C. Lalhruaitluanga nen an intawng nawn leh ang.