Leverkusen-in Bayern an pet chhuak

DFB-Pokal champion Bayer Leverkusen chuan round of 16 aṭangin Bayern Munich an pet chhuak a, Thawhlehni zan khan Allianz Arena-a inkhelah Xabi Alonso naute hian 1-0 in hnehna an chang.

Leverkusen tan inkhela goal awmchhun hi Nathan Tella khung a ni a, Bayern-in a chhanletna tur an nei lo - Bayern-in an chak loh chhanah chhuanlam tur an nei a, minute 17-naah keeper chhuanvawr Manuel Neuer chu hnawhchhuah a ni.

German keeper tawnhriat nei ṭha hian goal aṭanga tlan chhuakin, ball um lut mektu Jeremie Frimpong a titlu a, referee-in red card a pe.

Neuer-a hnawhchhuah a hma hret a, Leverkusen hian beisei aiin goal an khung har zawk. Mahse, minute 69-naah Alex Grimaldo-a cross chu Bayern keeper Daniel Peretz-a dan rual lohin Tella-a'n a khung.

Vincent Kompany enkawl Bayern hi striker chhuanvawr Harry Kane tel loin an inlan a, chance erawh an nei tho. Mahse, defender Dayot Upamecano, Kingsley Coman leh Kim Min-jae ten an chance neih chu uiawm takin an khung lo vek a, a tlawm zawkah an ṭang.

Alonso-a'n coach a nih hnuah German Cup-ah hian tlawm a la nei miah lo! Season hmasa khan Leverkusen hi he inelnaah hian champion puiin, a zawnin vawi riat a chak ta a, hetihlai hian kum 2020 hnuah Bayern hi he inelnaah hian an la champion lo.