Shaw a inhliam leh tawh!

Manchester United defender Luke Shaw chuan hliam a nei a, hun engmaw ti chhung chu inkhel thei loin a chawlh leh rih a ngai dawn niin club chuan thuchhuah an siam.

Kum 29 mi Shaw hian Man United a zawm hnuah hliam a nei ngun hle, a nih tur ang pawh a nih phak loh phah niin a lang. Man United-in an tarlan dan chuan, tun hma lam a hliam ang ni lo, hliam dang niin an sawi.

England international defender Shaw chuan, "Hun harsat tak ka lo hmachawn tawh ṭhin a, ka paltlang dawn hnai emaw tih lai takin hliam dang vangin ka chawlh leh rih a ngai sawn, sawi pawh a hrehawm ka ti hle.

"Natna in min tlak buak nasa a, a nihna takah chuan tunlai hi ka tana hun harsa ber a ni hial ang. Hliam han neih leh chiah mai chu rilru a baihvai a, ka pik mup mup a ni ber mai," tiin a hliam vangin a rilru a hrehawm tih a sawi.

Tun season chhungin Shaw hian match pathum chiah a la khel, a inlan pathum pawh hi bench aṭanga lut a ni hlawm.