Chak lo thinrim Barca an inhrithla

La Liga match thum zet a zawna an chak zawh loh hnuah Barca an insiamṭha ve leh ta a, Thawhlehni zan khan Real Mallorca chu 5-1 ngawtin an sawp - anmahni hnaih bertu Real Madrid aiin point liin an sang leh ta.

He thu buatsaih a nih lai hian Real Madrid aiin Barca hi match hnihin an khel tam zawk a, nizana inlan Real-in hnehna an chan chuan point khat lekin an inkar hi sawr zim a ni leh ang - result kan hre hman lo.

Barca tan khualmualah captain Raphinha chuan goal hnih a khung a, Ferran Torres, Frenkie De Jong leh Pau Victor ten goal khat ṭheuh an khung bawk. Mallorca tana Vedat Muriqi-a goal khung chu mualpho zualpui khuhna chauh a ni.

A harsa

Mallorca khelmualah Barcelona-in goal an khung hma a, minute 12-na lekah Robert Lewandowski aia bul ṭantir Torres chuan bul ṭan a phu tih pholangin goal hmahruai a khung a, Mallorca-ah Barca ṭantute au thawm a ring zawk.

Mahse, Barca hlim chhung hi a rei lo hle. Mallorca-in mawi zeta Barca offside trap an ṭhiah hnuah Vedat Muriqi chu a hmawr bawktu a ni a, Kosovo international striker hian minute 43-naah si phurh sutna goal a khung.

Barca-in first half chhungin goal dang an khung tawh lo a, 1-1 a chawlhlawk hman a nih avangin Catalan club ṭantute an hlauthawng - tun hnai an result thlirin a awm lo hran lo.

Thawhlehna chu

Mahse, Barca-in rei tak mutthluk an tum lo. Second half ṭan aṭanga minute 11-naah Lamine Yamal chuan penalty a hlawh chhuak a, a pet tura lo pen chhuak Raphinha chuan goal-a chantir turin harsatna a tawk lo.

Raphinha hian a duhtawk mai lo. An goal hnihna an khung aṭanga minute 18 hnuah Yamal chuan a thiam thil pholangin, Raphinha tan ṭha zetin a siamsak a, Brazilian forward tan goal-a chantir loh chi rual a ni lo - 3-1 a ni der.

Kum 27 mi Raphinha hian Barcelona-ah a football career-a hun duhawm ber a hmang mek tiin a sawi theih. Tun season inelna hrang hrangah match 21 khela goal 16 khungin, assist vawi 10 a nei tawh.

A tawpna chu

Barcelona-in goal thum an khungin chak tur a chiang tawh tiin a sawi theih a, bench aṭanga luhtir Frenkie De Jong leh Pau Victor ten fan-te thlamuang lehzuala an awm theih nan an belhchhah bawk.

Catalan club lawmna tizual turin, kar li vel hliam vanga a chawlh hnuin Yamal-a'n bul a ṭan ve leh ta a, a che ṭha nghal hle - penalty a hlawh chhuak a, assist a nei a, Mallorca tlarhnung tan a hnawk tluan chhuak ṭhak!

Yamal hi Las Palmas an hneh loh ṭum khan lo kir tawh mah se, bench aṭang bakin a lut lo a, bul a ṭan leh meuh chuan inkhel thawnthu a thlak danglam - Barca hian an league match hnuhnung pathum aṭangin point khat chiah an hlawh chhuak hman a, Mallorca lakah an insiamṭha leh ta.

Lamine hi kan player pawimawh tak a ni reng a, a theihna aṭanga teh phei chuan team tana danglamna thlen ṭhintu a ni. Zaninah pawh khan goal khat emaw goal hnih tal emaw chu khung thei a ni a, khung lo mah se penalty hlawh chhuakin, assist a nei leh tho bawk - hei hi a theihna chu a ni a, team hian kan mamawh a ni.
Chutihrual chuan Yamal chauh a khel ṭha lo a, player dang pawh an khel ṭha hle. Kan centre back-te pawimawhzia ka sawi fo ṭhin a, kan khelh dan system-ah phei chuan an tan a harsa lehzual. Mahse, zaninah pawh ṭha takin an hna an hlen thei.
- Hansi Flick, Barca manager