De Bruyne nen kan buai lo - Pep

Manchester City manager Pep Guardiola chuan an midfielder Kevin de Bruyne nen an inkarah buaina a awm lo tih a sawi a, inkhel tur thlan chungchangah duhsak bik a nei lo tih a sawi tel bawk.

De Bruyne hi season hmasa aṭang khan hliamin a tlakbuak fo a, tun season-ah pawh a hliam leh bawk. Tun season Premier League match bikah vawi li chauh inkhel bul ṭantu zingah a la tel.

Hliam vangin hun rei tak a chawl a, a lo kir leh hnuah substitute bench aṭangin a lut ṭhin a, a hliam dam hnua a inkhelh zat chu minute 72 chauh a tling! Liverpool an hneh loh ṭum pawh khan hun tawp hma minute 12 chauh awm tawhah dah luh a ni chauh.

Belgian midfielder hian chanchinbu mite hmaah a hma hun a chian loh thu a sawi zauh zauh a, season tharah Man City jersey a ha zui zel dawn em a sawi chiang thei rih lo, an manager Guardiola pawhin a tel loa a naute remkhawm dan a ngaihtuah niin an sawi.

Mahse, tun dinhmunah chuan an inkar a ṭha niin Pep chuan a sawi thung. Guardiola chuan, "Mite chuan Kevin nena buaina nei leh inkhelh tam tir duh lo ang te in min lo sawi tih ka hria.

"Ani hi chu player ṭha bik a ni a, a bik takin khingpuite goal bul hnaia hlauhawm ṭhin a ni, chutiang mi chu eng vanga chhawr duh lo nge ka nih ngawt ang tih chu ka zawh letna a ni zawk.

"Season hmasa khan hliam vangin thla nga a chawl a, tun season-ah pawh hliam vang bawkin thla hnih a chawl. A takza dinhmun kan ngaihtuahsak a ngai a, ṭha taka inkhel leh tur chuan hun a mamawh," tiin a sawi.

Kum 33 mi De Bruyne hian Man City tan tun season tawp thleng daih chauh contract a nei tawh a, a pawtsei lo a nih chuan nipui bazar hunah man nei loin a club duh zawng a zawm thei ang.