Djokovic-a bul ṭanna tur chu Brisbane

Tennis season an hmang zo fel chauh a, kum thara an inkhelhna tur tih fel chhunzawm leh nghal a ngai - Novak Djokovic chuan season thar bul a ṭan nan Brisbane International a hmang dawn tih a sawi.

Kum 37 mi Djokovic hian kuminah Grand Slam lak a nei miah lo, major title 24 tehmeuh nei tawh mah se kumina a champion lo hi a mak angreng hle, season tharah chuan Australian Open aṭangin thapui thawh a tum.

Serbian star Djokovic chuan, "Austrlia ram aṭangin tennis season ka ṭan leh dawn, a bul ṭan nana Brisbane International ka khel thei tur hi ka lawm. Australia ramah hian min thlawptu an tam em em a, chung mite hmaa inkhelh leh chu ka chak tawh a ni," tiin a sawi.

Brisbane International hi December 29 aṭanga January 5 chhunga khelh tur a ni. Season thara Grand Slam hmasa ber Australian Open chu January 12 aṭanga khelh tur a ni thung.