Solanke dinhmun a chiang lo?

Tottenham Hotspur chuan zanin dar 1:45 hian Premier League khel turin Bournemouth an lenchilh dawn, an striker ṭha Dominic Solanke chu a inlan thei dawn em tih a chiang lo.

Solanke hian kar hmasa khan training a zawm a, mahse haw tir leh a ni. An haw tir chhan hi chiang taka sawi a ni lo a, kar tawpa Fulham nen an inhnehtawk ṭum khan coach Ange Postecoglou chuan inkhel tur a inpeih loh thu a sawi.

Kum 27 mi Solanke hian tun season-ah Spurs tan league match 10 a khelh aṭangin goal li a khung tawh a, zanina an hmachhawn tur Bournemouth hi a club hlui a nih avangin a inlan thei a nih chuan an chak loh rukna lai a hre ṭha tura ngaih a ni.

North London club hian league match 13 aṭanga point 20 hmuin pasarihna an ni mek a, hmahruaitu Liverpool an phak lohna chu point 14 ngawt a ni tawh, season chanve pawh la hmang lo mah se champion beiseina a tlem tawh, a sang zual pali zinga tel tur pawhin thapui an thawh a ngai ang.