Arsenal tawnah Man United tui ang an nem!
Premier League champion tuma hmalam pan mek Asenal chuan an kawng dal tumtu Manchester United an thian fai, an mikhual hi 2-0 a lo hnehin an chunga awm Liverpool nen an inkar an sawr zim.
Emirates Stadium-a inkhelah Gunners tan defender pahnih Jurrien Timber leh William Saliba te chuan corner aṭangin goal an khung ve ve a, mikhual team lamin a chhanletna an nei lo.
Man United manager a nih hnuah a vawi khat nan Ruben Amorim a tlawm a, a club hmasa Sporting Lisbon a enkawl lai aṭanga chhiar zawm pawh ni se, tun season atana a ngam loh hmasak ber chu Mikel Arteta enkawl Gunners an ni.
Player thlan dan
Manager pahnihten hliam vangin an duh ang thlap player an chhawr thei lo. Gabriel leh Ben White te an inkhelh theih loh avangin Jakub Kiwior leh Oleksandr Zinchenko ten a bul an ṭan a ngai.
Jurrien Timber chu a khelh ṭhianna pangngai ni lo zawk, mual ding lam sirah White aia dah a ni. Declan Rice leh Martin Odegaard te thlawp turin Thomas Partey dah a ni a, Spanish midfielder Mikel Merino leh Jorginho te bench lamah an awm.
Ruben Amorim-a'n 3-4-3 hmang bawkin a naute a rem a, a formation hman duh tur chu a chiang ta. Harry Maguire chuan bul ṭanin tlarhnungah Noussair Mazraoui leh Matthijs de Ligt te nen an inkawp.
An match hmasa zawka hahchawlhtir Rasmus Hojlund chu mal tlat tir a ni. Denmark international hi Alejandro Garnacho leh Mason Mount ten an thlawp, tun hnaia khel ṭha Marcos Rashford chu bul ṭantu zingah a tel ve lo.
Laipui a puak
A tirah Gabriel Martinelli chun goal a khung nghal, mahse a siamsaktu Kai Havertz chu chiang taka a offside avangin hnawlsak a ni, team pahnih an inven fimkhur tawn em avangin goal hlauhawm tak kan hmu mai lo a ni.
Partey-a'n corner aṭanga ball kal tauh luh theihna remchang nei mah se goal ban hrulah a kal a, defender Zinchenko-a hlap an lo dan per chu Martinelli-a'n remchang hmu mah se goal zawnah a pet thei bik lo.
Chawlhlawk hmain Man United pawhin Diogo Dalot hmangin hun ṭha an nei a, mahse goal zawna a pet loh avangin keeper David Raya tan hna a harsa lem lo, second half-ah erawh thil a danglam ta.
Corner hi Arsenal hlauhawmna a ni - Man United inveng viau mah se Declan Rice-a corper pet chu Timber-a'n a tauh lut a, an goal hnihna Saliba khung pawh corner aṭanga ball kal bawk a ni, a hnuah Havertz chuan hnai takah a hlah zui bawk.
Arsenal an harh
November thlatir khan Inter Milan leh Newcastle United te a zawnin an hneh lo a, an boruak a zuai hman hle. Tunah erawh captain Martin Odegaard hoin duhtawkin an khel thei leh tawh, match nga chhung tlawm loin an kaltluang leh ta.
Emirates Stadium bikah match 500 an chak tling ta chiah a, an defender rinrawl Gabriel awm loh kara goal an chhuah chuang lo kha an lawmna belhchhahtu a ni tel ang - kar tawpah Fulham an lenchilh zui leh nghal ang.
Gunners manager Arteta chuan, "Premier League-ah Man United hi a zawnin vawi li kan hneh ta, hetiang thil hi kan tawn vawi khatna a ni a, goal chhuah loh bakah goal hnih kan khung thung, thil ṭha lam zel a ni.
"Khelmual chhung boruak a nuam a, ka hmuh dan chuan ka naute khan sawisel tur nei lo khawpin an khel chhuak. Min ṭantute hmaa hetiang hnehna lawma lam theih chu thil nuam tak a ni," tiin a sawi.
Amorim-a United
November 11 mai khan Manchester United atan Ruben Amorim an lakluh kha a ni a, hun a la nei tam lo. Arsenal nen an inkhelh hma khan, an khungpui tur nen chuan khaikhin chi an la ni rih lo tih a sawi lawk.
Inkhel chanve hma lamah Man United hi an inveng thei em em a, Arsenal degender Zinchenko tihsual vanga remchang an hmuhah defender Matthijs de Ligt-a ball tauh chu Raya-a'n a lo dang hram, lut se la inkhel result a danglam daih thei.
Mahse, an mikhualna rama Amorim-a naute hi team nghet lo zawk an ni tih chu phat theih a ni lo. Portuguese manager chuan, "Inkhel hautak a ni dawn tih kha chu kan hre sa a, ka hmuh dan chuan corner kha kan danglamna chu a ni.
"Team awmkhawm rei tawh leh inhrechiang an ni a, an thil tumah an chiang em em bawk. Kan khelh danah pawh lawmna tur lai tam tak a awm rualin, kil tinah siamṭhat hmabak kan la nei," a ti. Inrinni zanah Nottingham Forest nen an inkhel zui leh ang.