Inter Village Football quarterfinal : Bawngkawn Vs Ramhlun N; Tlangnuam Vs Lengpui

GIG Motors Inter Village Football 2024 quarterfinal chu vawiinah khelh zawh a ni dawn. Aizawl khaw pawn pahnih Kolasib Jt leh Melbuk ten semifinal an lut tawh a, vawiin hi Aizawl team ṭha inlar hunah a ngaih theih thung.

RG Stadium-ah vawiin chhun dar 11:00 hian Bawngkawn leh Ramhlun North te an inkhel dawn a, chawhnu dar 1:30-ah Tlangnuam leh Lengpui te an inkhel zui ang. Inkhel hi Zonet Zawlbuk, Rihnim leh YouTube channel-ah a en theih ang.

Final khel tlak team

Inelna ṭantirh aṭanga champion rinkai Bawngkawnin team ṭha an nihzia lantir zel a, mahse Lalrindika Hmar hote hian quarterfinal thleng turin Zemabawk North chu penalty shootout hmangin an hneh hram. Chutihrualin hun pangngaiah Mission Vengthlang (4-1) leh Armed Veng South (2-1) an hneh tih hriat a ṭha.

Ramhlun North hi tualchhung football hrechiangtu H. Lalremruata enkawl an ni a, Bawngkawn hi an u en bik dawn lo. Remruata hote hian last 32-ah Chanmari (3-2) an hneh a, Sairang Jt (4-2) leh Chanmari West (5-3) hneh tawh bawkin hnehna chang turin penalty shootout an la mamawh ve lo.

Bawngkawn hian goal nawr turin MS Dawngliana, Lalpekhlua, Silvana R. Lalruatkima leh Joseph Lalvenhima te an kawl a, football hmuhnawm khel thei tur an ni. Chutihrualin Ramhlun North hian Mizoram striker F. Lalawmkima leh Aizawl Fc striker hlui B. Rohmingthanga te an kawl. Ball ṭha pe turin Lalremtluanga (Mamatea) a awm bawk.

Tlangnuam an ṭha

Lengpui hian Rohmingthanga hoin CYMA Football hialah an champion tawh a, tun ṭumah pawh coach Lalbiaknia (Valtea) hoin quarterfinal thleng pha mah se champion rinkai an ni pha lo. Vawiin inkhel turah chuan coach Francis Vanlalpeka enkawl Tlangnuam an buk a rit zawk.

Lengpui hian Chite (1-0) leh Chhinga Veng (2-1) te an hneh bakah Tuivamit (8-0) an sawp a, a ṭha pariat zingah an inpettling. Chutihrualin CYMA Football 2006 an champion ṭuma player pawimawh Lalchhuanmawia chu rinrawl a la ni a, Chanmari FC forward Lalrokima chungah an innghah nasa bawk.

Tlangnuam erawh CYMA Football final an luh ṭum kha nikum mai a la ni a, coach ngai Francis-a'n a la enkawl bawk avangin team chhung boruak a ṭha. Mizoram tan pawha khel tawh Vincent Lalduhawma (goal 5) leh goal nga khung tawhtu M. Lalpektluanga ten team an ti ṭha pha a, Vanlaldinpuia pawhin goal thum khung tawhin a chevel a hmuhnawm hle.