Zaninah Pro Fight hmawr bawk dawn
Boxer 286 ngawt an telna Zudio LPS Pro Fight 2024 chu zanin hian a hmawr bawk a ni dawn. LPS Arena, Falkland Vengah zan dar 8:00 aṭang ennawm chhuah ṭan a ni ang.
Nimin zing khan Title Fight turte chu LPS Auditorium, Zarkawta Title Fight-a inlan tur boxer 10 inbukin khel thei turin an tling vek.
Professional boxing chhinchhiahna, boxrec-a ziah luh tura ruahmanna siam tawh chu tihdanglam a ni a, inhnek dang ang bawkin promotional boxing pangngai anga kal tlangpui a ni dawn thung.
Welterweight:
Title kawl mektu Lalruatzela Hauzel hmaah Lallawmawma (Tuipui) a ding dawn. Mission Veng boxer Rustzela chuan, "A khel ka hmu tawh a, a ṭha khawp mai. Mahse, min hneh turin a ṭha tawk loin ka hria," a ti.
Ruatzela hi kum 2022 Pro Fight semifinal-ah a tla a, nikum khan title fight-ah Lalruatpuia, Saikhamakawn hnehin a vawi khat nan Pro Fight welterweight-ah a champion a. Professional boxing vawi li a khelh tawhah ṭum hnih chakin vawi hnih a tlawm a ni.
A hmachhawn tur, Lawma chuan, "A inkhel video aṭanga ka en aṭangin ka hneh ngei ka inring,” a ti. National Games silver medal hnek chhuak tawh Lawma hi Pro Fight-a a tel vawi khatna a ni a, title chuh tura a kalkawngah Manglianson, Lalhriatrenga, Lalnunsanga leh Zoremsanga te a hneh.
Lightweight:
Pro Fight-a a tel hmasak bera title chuh nghal turin Lalkhawngaiha a tling a, a khingpui tur chu C. Lalhruaitluanga a ni. Khawngaiha chuan, “Ka inpuahchahna a ṭha a, awlsam takin a che ngawt lo ang. Round laktir ka tum lo a, round li khel tur kan nih chuan ka la vek ang,” a ti.
Cherhlun boxer Lalhruaitluanga a zam bik lo. Hruaitluanga chuan, “Kum tluanin Sete Boxing Academy-ah coach hnuaiah ṭha takin ka inbuatsaih a, taksa leh rilruah ka inpeih tawk,” a ti.
Hruaia hian 2023 title fight-ah HC Lalramfela a hneh lo a, champion lai hi welter-ah a insawn avangin a la tawn ngai loh Khawngaiha nen kawltu nei loa awm mek light champion kawnghren an inchuh dawn a ni.
Flyweight:
Kum 2023 title fight-ah inhnial theih takin Valalenkawltira'n NT Lalbiakkima a hneh lo a, champion lai hi tun ṭumah a tel theih loh avangin title a kalsan rochun tumin Enkawla’n hmabak pakhat hlen tur a nei, a hmaah Lalrinngheta a ding dawn.
Enkawla chuan, “Kum tluanin Alpha Gym-ah ka inpuahchah a, a tir atangin ka duh ang takin ka hnek chhuak thei ang. Kei aia hnek rang leh ṭuan ṭha zawk a nihna ka hre lo va, hemi kawngah hian kei aia ṭha ka hre lo," a ti.
Rinngheta nen hian kumin July 26 khan LPS Fight Night-ah intawng tawhin chak zawk awm loin an inhnehtawk. Rinngheta chuan, “Zamna ka nei lo a, min hneh lo viau ang,” a ti. Rinngheta hi kum 2022 khan bantamweight-ah a lo champion tawh a ni.
Middleweight:
Title kawl mektu C. Lalhruaitluanga chuan F. Lalthanliana Jr lakah fiahna a hmachhawn dawn. Champion lai Hruaia chuan, “Ka inbuatsaihna a ṭha a, ka title kawl mek hi min chhuhsak lo ang. A ṭhatna ber hmanga hneh ngei ka châk hle a ni,” a ti.
Kum 2022 khan welterweight-ah Hruaia a champion a, nikumah middle-ah insawnin title fight-ah Thanliana hnehin Pro Fight chanchina weight hrang pahniha champion thei zingah a inhlangkai a; mahse, November 30 khan Bangalore-ah WBC India title a chuh a, Ritesh Singh a hneh lo a ni.
Thanliana chuan, “Ka inpuahchahna a ṭha a, a ṭul chuan tharum hmang pawhin, a ṭul dan ang ang in title lak ngei ka tum,” a ti. Kum 2023 khan a vawi khat nan Pro Fight-ah Thanliana a tel a, title fight-ah Hruaia hneh loin a tlawm a. Kumin intawng nawn lehin title an inchuh leh dawn, a hmuhnawm ang.
Bantamweight:
Laldinsanga hi title kawl mektu a ni a, a khingpui tur Omega Lalramdina lakah hloh a tum lo. Dinsanga chuan, “Boxing hi a hahthlak a, a rorum bawk a, tute emaw hnenah title pek mai mai chi a ni lo,” a ti a, chak ngei a tumruh hle.
Inrinni kal ta maiah khan Dinsanga hian Bangalore-ah rahbi thar tukin WBC Youth bantam world title a la a, Pro Fight title humhim turin a inthlahdah phah dawn lo tih chiang takin a sawi.
Dinsanga hmachhawn tur Ramdina chuan, “Kum thum chhung hnathawk pahin boxing ka zir tawh a, ni tin hma ka sawn zel a, a title kawl lai ka laksak theih ka inring,” a ti. A vawi khat nan title fight hmachhawn dawn mah se a zam lo, professional boxing bikah ṭum hnih inhnek tawhin, a chak ve ve a ni.