Manchester City an tho leh ta

Manchester City boss Pep Guardiola-a'n, "Ka player-te min pe kir leh ula, inhre mai ang," tiin, an chak hleihtheih loh lai khan a sawi a, a player ṭha tam tak inhliam vanga result chhia an nih thu a sawi.

Pep-a player-te la dam kim lo mah se, September hnua a vawi khat nana Kevin De Bruyne-a'n City tana inkhel bul a ṭan meuh chuan City an chak chiang hle - an mikhual Nottingham Forest chu 3-0 in an hneh.

City tan Bernardo Silva, Kevin de Bruyne leh Jeremy Doku ten goal khat ṭheuh an khung a, beisei phak baka season hmang ṭha Forest-in match sarih zet a zawna chak zo tawh lo City lakah goal an khung thei lo.

Manchester City-in 1-0 leka hma an hruai laiin Forest hian si phurh sutna remchang an nei a, mahse, KDB tihsual zarzoa a chance neih chu Chris Wood-a'n goal-ah a chantir thei tlat lo - City-in goal hnih an khung belh a, an chak chiang.

Pep-a'n Forest lakah thutlukna huaisen a siam a, goalkeeper Ederson chu number 1 a la nih thu sawi reng chungin bench-ah a dah a, Stefan Ortega chuan bul ṭanin a khel chhe lo - KDB bul, midfield laiah Jack Grealish a dah a, a tisual lo bawk.

City boss Pep chuan KDB chungchang sawiin, "A lo kir leh thei ta hian min tihlim takzet - minute 75 chhung ṭha zetin a khel thei a ni. Player ngainatawm tak a nih avangin a ṭha ber a phu a, he club a zawm tirh aṭangin a pawimawh em em reng ani," a ti a, KDB tan ngaihthlak a nuam ang.

Pep chuan inkhel chungchang sawi zuiin, "Chak hi kan mamawh em em a, kei chauh ni loin he club leh player te pawh hian an mamawh a, kan mamawh em em vek - mahse, match khat chauh a nih hi," a ti a, a ṭawng fimkhur rih hle.