Liverpool chelh dingtu Newcastle United

Premier League hmahruaitu Liverpool elpuiten lawmthu hrilh tur an nei a, an hming chu Newcastle United a ni - Nilaini zan khan Magpies hian Liverpool an mikhual a, 3-3 in an inhnehtawk a, table chung berah point sarih chauhin Reds an sang fal ta.

St. James' Park-a inkhelah Alexander Isak leh Anthony Gordon hmangin Magpies hian vawi hnih ngawt hma an hruai a, Liverpool hian Curtis Jones leh Mohamed Salah hmangin si phurh an sut ve ve.

Hun tawp dawnah Salah hian khung belhin, Reds ṭantuten an chak dawn emaw an inti hman tawh a, mahse, tun hnaia fak hlawh keeper Caoimhin Kelleher a chesual a, Isak-a free kick pet chu a chhutsual.

Kelleher hian awlsam taka man theih chu man loin, a en liam a, hei hi Schar chuan lo chang fuhin a khung a, minute 90-naah Newcastle-in si phurh an sut - Chelsea, Arsenal leh Manchester City-ten an khingpui ṭheuh an hneh laia Liverpool chak zo lo hi an lawm khawp ang.

Inkhel hmuhnawm

Newcastle-in Real Madrid leh Manchester City hneh hlim Liverpool hneh ngei an duh a, inkhel ṭantir aṭangin Reds hi an nawr nghal - fixture hautak Liverpool an talbuai a, tlarhnung a pherh takzet.

Mahse, Liverpool hian chance hlauhawm erawh an nei hmasa zawk a, Argentine midfielder Alexis Mac Allister-a'n chance duhawm vawi hnih a neih chu goal-ah a chantir thei lo ve ve - Nick Pope-a'n ṭha taka a dan bakah post a tihper bawk.

Magpies pawhin chance duhawm an nei zui ve tho. Mahse, Jacob Murphy-a'n post a tihper a, a khung thei bik lo. Minute 35-naa Alexander Isak-a chance neih chu dan rual a ni tawh lo a, Swede striker hian kawh pawtin a khung.

Minute hnih a liam a, centre back-a khelhtir Joe Gomez a chesual zui. English defender hian long ball dan a tumna lamah Gordon tan a siamsak a, mahse, Everton forward hlui hian Kelleher a paltlang thei lo.

A hming Salah

Goal dang lut loa chawlhlawk hman a nih hnuah Liverpool an ziaawm sawt a, second half ṭan aṭanga minute ngana lekah Curtis Jones chuan si phurh sutna goal a khung - Salah siamsak a ni.

Liverpool hlim chhung erawh a rei lo. Minute 12 a liam a, Magpies bawkin hma an hruai nawn - Gordon chuan first half-a a goal khung loh thup nan, ṭha zetin Magpies goal hnihna a khung a, 2-1 in hma an hruai.

Mahse, mualneitu team hian player ngam loh an nei a, a hming chu Salah a ni. Liverpool thiampuipa hian minute 68-naah si phurh a sut a, minute 83-naah a belhchhah bawk - goal ṭha bika chhal ngam ve ve a ni a, league-ah goal 13 a khung ta.

Hei hi inkhel tawpna erawh a ni lo. Minute 90-naah Schär chuan goal khung ve lehin, si phurh a sut a, team pahnih hi 3-3 in an ṭin - Salah goal khung kha bench aṭanga luhtir Trent Alexander Arnold siamsak ve ve niin, Premier League-a assist a neih 61-na a ni a, PL defender zinga assist ngah ber a ni.