Goal khung thiam Chelsea

Chelsea-in Southampton lakah goal khung an thiam tih an pholang - Premier League table mawngphah luahtu Southampton chu 5-1 ngawtin an sawp a, hmahruaitu Liverpool mawng an hiat pha ta.

Blues tan Axel Disasi chuan minute sarihna lekah goal hmahruai khungin, a team hma a hruaipui a, mahse, minute thum hnu lawkah Joe Aribo chuan si phurh a sut a, 1-1 a ni der!

Saints an chesual zui. Chelsea-in Christopher Nkunku leh Noni Madueke hmanga an khung belh hnuah, Southampton captain Jack Stephens chu Marc Cucurella sam a pawh avangin referee Tony Harrington-a'n a hnawt chhuak a, player pakhata tlem chungin, Saints hi 3-1 in an hnufual.

Premier League mawngphaha awm mek team hi an tho dawn lo tih a chiang tawh a, Cole Palmer leh Jadon Sancho ten Blues tan khung ve lehin, khualmualah London club hi 5-1 in hnehna an chanpui a, nomawi beiseina a nung ve zel.

Chelsea vanneih zan ni se, goal dang khung belh thei an ni. Palmer leh Tosin Adarabioyo ten woodwork an tih per a, Joao Felix-a'n uiawm takin a tauh goal thei lo a, Madueke leh Nkunku ten an chance neih dang an chhawr lo bawk.

Blues boss Enzo Maresca chuan, "Kan fan-ten hlim taka min lo thlawp hmuh kha a nuam hle. Fan-te hlimna thlen hi kan duh ber chu a ni a, chutiang nui hmel kan hmu thei chu kan lawm hle.

"Ni tinin kan fan-te hlimna thlen tumin hna kan thawk a, an hmangaih em em. Chelsea tak tak kha a lo kir leh taa an ngai hian min tilawm a, kan tan chuan a pawimawh takzet," a ti.

Maresca chuan inkhel thlirkirin, "Goal nga kan khung avangin ka lawm a, mahse, inkhel ṭantir lam minute 15-20 inkar kha chu kan talbuai takzet a, ka lawm lo hle. A chhan pawh, ball an chan reng rengin chhuhsak tuma nawr nghal zel turin kan inti a, ka tih angin kan khel lo.

"A hnuah kan insiamrem a, kan game-in awmzia a nei ve leh chauh. Goal nga aia tam pawh khung thei tur chu kan ni ngei a, mahse, kha pawh kha a tawk viau e," a ti a, an khelh danah an lawm tawk thu a sawi.