Real-in an hun ṭha an bawh pelh!

Barcelona-in an league match hnuhnung paliah vawi khat chiah hnehna an chan avangin Real Madrid-in league hmahruaitu hi um phakna hun ṭha an nei a, mahse, an hun ṭha neih an bawhpelh.

Nilaini zan khan Athletic Bilbao chu 2-1 in an ngam lo a, point liin hmahruaitu Barcelona an hlat chhunzawm. Real hian match khatin an khel tlem zawk a, an hmabak match-ah chak pawh ni se, point khatin Barca hi an la thlau dawn tho a ni.

Bilbao tana Alex Berenguer-a goal khung chu Real hian Jude Bellingham hmangin an chhanglet a, mahse, Gorka Guruzeta chuan goal khat khung ve lehin, mikhual Real lakah Bilbao a chakpui - Kylian Mbappe chuan penalty a hlah!

Aw Mbappe...

Bilbao khelmualah first half chhungin goal a lut lo a, second half-ah rin loh zawkin goal an khung hmasa - minute 53-naah Berenguer chuan Bilbao hmahruaina ni turin a khung a, 1-0 a ni.

Real hian si phurh sutna remchang an nei vat. Bilbao keeper Julen Agirrezabala chu Antonio Rudiger lakah foul-in, penalty a chawi a, a pet turin Kylian Mbappe a lo pen chhuak.

Mahse, French striker hian a chance neih ṭhat hi goal-ah a chantir thei lo! Mbappe hian Champions League-ah Liverpool lakah penalty a lo hlah tawh bawk a, French striker 'puja' a fuh hlei thei lo.

Hey Jude

Mbappe-a'n penalty a chhuih luh loh hnuah Bellingham a inlar a, beisei a phak loh vanga sawisel hlawh hman, tun hnaia harhtharna chang midfielder hian minute 78-naah si phurh sutna goal a khung.

English midfielder goal khung hi tun season-a goal li a khungna chiah a ni a, mahse, a goal li hi a league match hnuhnung pali aṭanga a khung a ni - inelna hrang hrangah match 17 a khel tawh a, assist vawi nga a nei bawk.

Bellingham 'form' leh ta hi Real tan chanchin lawmawm a tling a, an hlim chhung erawh a rei lo - minute hnih hnu lawkah Guruzeta chuan Federico Valverde tihsual zarzoin chakna goal a khung.

Mbappe chhanna

Liverpool lakah penalty a chhuih lut lo a, Bilbao lakah a chhuih lut lo leh a, an tlawm ve ve bawk - Carlo Ancelotti-a'n a player Mbappe a chhan a ngai ta a, Italian coach hian a striker chu hun pek a ṭul thu a sawi.

Ancelotti chuan, "A theihna sang ber angin a awm lo a, mahse, insiamrem hun kan siam a ngai. Tun season-ah goal 10 a khung tawh a, a aia ṭha zawka ti turin a bei zel a ni. Mbappe ka la titipui rih lo a, match sawi thiam harsa tak a ni.

"Si phurh kan sut khan inkhel kan thunun zui kan beisei a, tihsual hotê vangin kan buai zui a ni. Penalty kan hlah a, mahse, vanneih leh vanduai inkar thil penalty hmangin ka player thiamna ka teh dawn lo. A hnual em em a, mahse, kan chawl thiang lo," tiin a sawi.