Dutch GP a tawp dawn

Formula 1 Dutch Grand Prix chu kum 2026 hnu lamah kan hmu chhunzawm dawn lo - Netherlands ramah hian intlansiak neih chhunzawm tura inbiakna awm mah se, sum lam harsatna avangin neih zui loh an thlang ta zawk.

Zandvoort tlan kawngah hian kum 26 ngawt an chawlh hnuah kum 2021 aṭang khan an tlan leh a, hlawhtling takin intlansiak pawh an nei ṭhin. Mahse, Netherlands hian driver ṭha bik Max Verstappen an nei chungin an hlawkpui zo lo.

Dutch Grand Prix director Robert van Overdijk chuan, "Mimal sumdawnna thil a ni a, kan sum lakluh leh a luang chhuak te inrem takin a awm a ngai, chumi tur chuan ruahmanna pawh kan neih a pawimawh. Kum 2025 leh 2026-ah chuan intlansiak a awm leh ang, a hnu lam erawh sawi theih a ni tawh lo," a ti.

Ruahman lawk dan chuan season tharah Dutch GP hi August 29-31 chhunguin an tlan ang, kum 2026 atan erawh an tlan hun tur tih chian a la ni lo thung.