Aizawl FC-in khualmualah chak an tum

Aizawl FC chuan December 8, Pathianni tlai dar 2:00 hian Namdhari an hmachhawn dawn. I League inkhel hi Sony Ten 1 leh online hmanga en duh tan SSEN-ah a en theih bawk.

Victor Lalbiakmawia kaihhruai Aizawl FC hian Mizo hlanga an khel chungin tun season-ah chak loh an la nei lo a, match thum khelhah point nga hlawh chhuakin table-ah panganaah an awm mek. Chutihrualin Mizo club hian goal an khung tam tawk lo a, match thumah goal thum chauh la khungin Lalhriatpuia'n goal hnih a khung tawh a, goal khat dang hi an khingpuiten an tih goal sak a ni thung.

Aizawl FC coach Victor chuan, "Table-a kan hnuaia awm Namdhari kan khel dawn a. Zuam sual lo turin kan in ven a ngai ang. Away-ah point thum hlawh chhuah kan tum dawn. Kan forward te hriam leh deuh se result ṭha kan nei thei ang," tiin attacking football an khelh tur thu a sawi.

Mizo club hian season liam taa I League-a Indian player goal khung tam ber Lalrinzuala an chelh thei a, Serchhip forward hi dam chho ṭanin goal a khung thuai tura ngaih a ni. Chutihrualin goal tam zawk khung tur chuan Aizawl FC winger Augustine Lalrochana leh Lalbiakdika te an rilru a fim lehzual a pawimawh.

Tlarhnung lam erawh an la che ṭha a, match thumah goal khat chauh an la chhuah. Aizawl FC coach Victor chuan, "Kan defence-te match tinah rintlak an nihzia kan hmu zel a. Gokulam nena kan khel kan enlet pawhin box chhungah chuan kan defender-ten space an pe lo, long shot leh long ball aṭang chiahin chance an insiam tih kan hmu," tiin tlarhnung a fak.

Mahse, Gokulam an hmachhawn ṭumin goalkeeper Lalhriatpuia a inhliam a, a kut ruh a tliah avangin tun season-ah a inlan theih a rinawm tawh lo. Namdhari lakah Joel B. Lalramchhana'n bul a ṭan dawn a, FC Venghnuai aṭanga I League club zawmtu tan hming chherna hun ṭha a ni ang.

Inkhelhna hmun tur hi Namdhari Stadium, Ludhiana a ni a, Kerala a lum viau laiin Punjab lam erawh a vawt tawh. Chutihrualin Ludhiana hi vawt uchuak a nih loh avangin Mizo player tan pawh inkhel a nuam zawk turah a ngaih theih. Mizo hlanga khel Mizo club-in Mizo awm lohna Namdhari an hmachhawn dawn. Punjab club hian foreigner panga ngawt an nei thung.