Merseyside derby: Everton khelmualah Liverpool

Premier League table chung ber luahtu chu Liverpool an ni a, anmahni hnaih bertu Chelsea aia an sanna chu point sarih a ni - champion beisei ni si lo team zingah Liverpool hmahruaina pawh hniam duh an awm a nih chuan Everton an ni ang.

Liverpool leh Everton thawnthu hlui ziak turin hun leh hmunin min daih lo a, club pahnih inhalzia pawh sawi nawn a ngai lo. Khaw khat club pahnih inthlau tak hian beisei an nei ve ve a, an beisei erawh a inang lo.

Reds-in champion an tum a, Everton-in him an tum thung. Zanin dar 6:00-ah club pahnih hi an intawng dawn a, table-a 15-na dinhmun luahtu Everton hian mahni khelmual ngeia Liverpool lo hneh hi an châk dawn - a thleng lo ang tih a sawi theih loh.

A hautak

Liverpool-in October leh November-ah fixture hautak em em an hmachhawn a, mahse, an tawlhthlu lo. December an chuang kai a, Real Madrid (2-0) an hneh hnuah Manchester City (2-0) an hneh leh a, football expert tam zawkin champion-ah an puang der.

Mahse, fixture hautakin a ken tel hliamin Reds a tlak buak tel zui a, an buaina chu Nilaini zan inkhelah a lang zui - Newcastle United khelmualah point khat an hlawh chhuak hram a, coach Arne Slot-a'n theih ang tawka squad a siksawi chungin Liverpool player-te an chau tih a lang.

Ni sarih chhunga Real, City leh Newcastle hmachhawn kha thil awlsam a ni lo tih a lang a, ni thum pawh a liam hmain Merseyside derby an khel zui dawn - Everton tan tun hun tluka Liverpool hmachhawn nana hun duhawm hi a awm chuang lo!

An kim lo

Hliam vangin Slot a buai ṭan a, player hrem an lo la awm zui - Alexis Mac Allister chuan Magpies lakah tun season Premier League-a a yellow card pangana a hmu a, hei vang hian zaninah Everton a hmachhawn ve thei dawn lo.

Hliam vangin Alisson Becker, Federico Chiesa leh Diogo Jota te chu an chawl reng tawh a, Ibrahima Konate, Conor Bradley leh Kostas Tsimikas te inhliam ve lehzel hi Liverpool tan chuan a pawi - Magpies lakah kan hmu.

Andy Robertson nena inthlak reng Tsimikas a awm loh avangin Scottish defender-in game a khel zawn deuh a, Magpies lakah a chau tih a hriat a, Konate awm loh hlanin Virgil van Dijk-a dinpui Joe Gomez chuan a hna a hlen ṭha tawk lo bawk.

Engtin nge?

Alisson a la dam chian miau loh avangin, Magpies lakah Caoimhin Kelleher chesual deuh mah se, si ban a nghah leh a ngai a, Joe Gomez pawhin VVD kawp lehin, Newcastle laka chawlh hahdamtir Trent Alexander-Arnold leh Andy Robertson ten fullback hna an thawk leh ang.

Midfield-ah Ryan Gravenberch pawh a hah tih a hriat a, mahse, Slot-a'n Wataru Endō a rintawk miau loh avangin Dutch midfielder bawk bul ṭan tura beisei a ni a, Mac Allister inhliam vangin a kawppui turin Curtis Jones a luh a rinawm.

Dominik Szoboszlai pawhin tlarhma thlawp turin bul a ṭan a rinawm a, Darwin Nunez chu bench lamah letin, Luis Diaz a lut ang a, Cody Gakpo leh Mohamed Salah ten mual sir aṭangin an thlawp ang - Salah hian tun season inelna hrang hrangah match 21 khela goal 15 khungin, assist vawi 12 a nei tawh tih theihnghilh lo la.

Everton hi

Tun season-ah Everton an talbuai takzet. Mahse, an league match hnuhnung pangaah a zawna an chak zawh loh hnuin, Wolverhampton Wanderers chu 4-0 ngawtin an sawp a, an phur vanglai takin Liverpool an mikhual dawn - a 'timing' a fuh hle.

Chutihrual chuan Everton hian tun season-ah goal 21 zet league-ah an chhuah tawh a, goal khung lama ṭhahnem ngai tak Liverpool an mikhual dawn avangin tlarhnung lam chu an inven uluk deuh a ṭul dawn.

Everton tan Wolves hneh hnua Liverpool hneh a châkawm ang tih a chiang a, Premier League hmahruaitu hi kut ruaka an hawtir theih chuan English top flight league-a inhamtang turin an phur lehzual ang.