Tottenham mualah Chelsea an lut dawn

London Derby a ni dawn a, boruak chu a sang leh dawn tih a chiang - Pathianni zan dar 10:00 hian Tottenham Hotspur chuan Premier League khel turin Chelsea an lo mikhual ang.

Spurs hian Ningani zan khan league match an khel a, khualmualah Bournemouth chu 1-0 in an ngam lo. An chak loh hnuin Tottenham ṭantute ngeiin an mahni player leh coach an auel - Blues lakah an tlawm zui leh a nih ngat chuan coach Ange Postecoglou dinhmun a derthawngin a rinawm.

Season hmasa khan Tottenham Hotspur Stadium-ah Chelsea chuan lam an lo thai tawh, an chak dan erawhin sawi zui a hlawh thung - Spurs lamin goal an nei hmasa a, mahse an defender Cristian Romero hnawhchhuah a nih bakah penalty an chawi.

Destiny Udogie hnawhchhuah a ni leh a, player pahniha an kim loh hnuah Nicolas Jackson chuan hattrick a siam khum - Spurs tan chuan a nat dan a na zual bik tih a chiang a, tun hi an tan phuba lak theihna remchang a ni ang.

Liverpool, Arsenal leh Manchester City te inum thawm a ring a, thawm ring vak loin Chelsea an kal thung - Blues hi Gunners leh Man City chunga awm lai an ni a, coach thar Enzo Maresca-a'n hna a thawk ṭha tih chu an point hmuh zatin a ti fiah.

Season hmasa an talbuai lai pawha buai ve lo Cole Palmer chu an innghahna a la ni reng a, English forward hi Spurs tlarhnung tana buaina thlen thei tur a ni leh ang, tlarhma lamah Jackson nen an inkawp chu dan harsa tak an ni ṭhin.

Tun hnaia hmuh hmaih thiang lo chu Enzo Fernandez che vel a ni bawk - Argentine midfielder hian inrintawkna a nei sang a, ball a sem tamin a hlauhawm laiah a dah lut thiam bawk, ani ven hi tharum ngah Yves Bissouma hna pawimawh a ni ang.

Blues hian duhthlan tur player an ngah avangin tuin nge inkhel bul ṭan ang tih sawi lawk a harsa ṭhin, mahse mamawh hunah chuan Joao Felix leh Jadon Sancho te an la nei bawk - kar laihawl match an neih khan striker ṭha Jackson chu a hahdamtir thei hial a ni.

Spurs tan thapui thawh a ngai dawn - coach Ange Postecoglou leh a naute hian Man City 4-0 ngawtin hneh thei mah se, a hnuah match thum khel leh tawhin chak ni hmel an la hmu leh miah lo, champion an sawi ngam tawh rih lo.

Postecoglou hian tun hmain club leh ram a enkawl tawh hoah chuan, season hnihnaah nomawi a chawi ṭhin. North London club hlawhtlin pui tur erawhin hmabak a la ngah. Chelsea lakah an tlawm zui leh a nih ngat chuan a dinhmun a derthawng thei hialin a rinawm.