Amorim hmaah che ṭha Forest

Manchester United-in zanin dar 11:00 hian an mual Old Trafford-ah Nottingham Forest an mikhual dawn. Premier League-ah Man United hi 13-naah an awm mek laiin Forest erawh pasarihnaah an awm thung.

Ruben Amorim hnuaiah Man United-in bul ṭan chhe lo mah se fak chiam tur an la awm lo a, Arsenal lakah phei an goal bawh a na lo a, Portuguese manager hnuaiah a vawi khat nan an chak lo.

Gunners laka corner kick aṭangin goal hnih an chhuah a, Amorim-a hoten set piece ven dan an zir nawn a ṭul. Chutihrualin Forest an hmachhawn dawn avangin goal nawr tura an inbuatsaih a ṭul ang.

Forest coach Nuno Espirito Santo chuan, "Ruben hian player-te hrechian tumin hma a la mek. An khelh dan hmang chu a hriatthiam theih a, a khel turte erawh a thlak kual nasat avangin hriatthiam a har thung," tiin a sawi a, an khelh dan an belh a ṭul thu a sawi.

Nuno hote hian Man United chelhtu Ipswich Town hneh thei mah se kar laihawl khan Man City lakah 3-0 in an tlawm a, Arsenal leh Newcastle pawh 3-0 leh 3-1 in an hneh lo. A tawi zawngin tun hnaiah Forest an che ṭha lo.

Hei vang bakah hian Man United hi an muala khel tur an nih avangin chak ngei a ṭul a, Amorim-a'n a naute goal nawr turin thu a pek a rinawm. Captain Bruno Fernandes mawhphurna a sang dawn a; hrem vanga Gunners hmachhawn thei lo - Kobbie Mainoo leh Lisandro Martinez te pawh an chhawr leh thei tawh ang.

Defender Leny Yoro pawh bul ṭan thei zingah a tel a, goal nawr turin Amad Diallo leh Marcus Rashford te pawhin bul an ṭan nghal thei bawk.