Selhurst Park-ah Manchester City leng dawn

Hmanni lawk kha chu ni se, Crystal Palace khelmuala Manchester City leng tur hi sawi 'hot' tham a ni lo ang - chak chiangsa chu Pep Guardiola enkawl 'City' an ni mai!

Mahse, tunah chuan thawnthu a danglam tawh. Pep leh a naute inelna hrang hrangah match sarih zet a zawna chak nei loin an kal a, hetih chhunga an hneh loh zingah Bournemouth leh Brighton & Hove Albion an tel a, "Football-ah chuan eng pawh a thleng thei," tih kha a takin an thlentir.

Mahse, City hi Nilaini zan khan an mamawh tak result an nei ve ta a, Nottingham Forest chu 3-0 in an hneh - an thaw huai ang chu! Zanin dar 8:30-ah league match khel turin City an inlan zui dawn a, khualmualah Crystal Palace an lenchilh dawn.

City an chak tluang tawh ang em? tih hi mipui tam zawk inzawhna a ni a, hei vang hian zanin an inkhel tur hian ngaihven a hlawh khawp ang. Pep chuan Forest an hneh zawh khan, "Hnehna chan kha kan mamawh em em vek a ni," a ti thlawt a, an boruak rit lutuk chu a kiang deuh tih a lang.

Spanish coach chuan, "Selhurst Park-ah kan leng dawn a, an khelmual a nih avangin a awlsam ngai lo," a ti a, a ṭawng fimkhur sawt hle - chutihrual chuan Palace khelmuala an len hnuhnung vawi ngaah City hian tlawm an nei lo!

Pep chuan, "Hnehna kan chan khan eng ang takin nge min nghawng kan hre thuai ang," a ti a, zaninah chak a châk hle ang tih a chiang - January leh February chhoah fixture hautakin City hi a lo hmuak dawn a, Pep tan chetsual a hun tawh lo tih a chiang.

City hian February thlaah Arsenal, Newcastle United, Liverpool leh Tottenham Hotspur a zawna tum an nei dawn a, Pep pawhin hei hi a hre lawk ran ang tih a chiang a, fixture a awlsam laia chetsual loh a pawimawh.

Chutihrual chuan Palace hi match li a zawna an chak zawh tawh loh hnuah, an match hnuhnung berah Ipswich Town chu 1-0 in an hneh ve tho a, an phur ve vanglai tak a ni tih theihnghilh loh a ṭha.