Club World Cup inhmachhawn dan tur a chiang

Manchester City chuan an nomawi kawl lai humhim turin hna hautak an thawh a ngai dawn - FIFA Club World Cup group match-ah Man City hian Juventus an hmachhawn thei dawn; Old Lady bakah hian Wydad leh Al Ain te nen Group G-ah an awmkhawm a ni.

Khawmualpui hrang hranga club-te inelna Club World Cup hi kum 2000 aṭanga khelh ṭan kha niin, season hmasa thleng kha chuan team 24 an inlan ṭhin a, nakkum aṭang chuan inlan thei zat hi 32-ah tih pun a ni thung.

Inelna hi United States chuan an thleng dawn - kum 2025 June 15 aṭanga July 13 chhungin an khel ang, European league lian ten nipui chawlh an neih laiin club inelna hautak hmachhawn tur an nei dawn tihna a ni.

US bakah hian Canada leh Mexico ramah te pawh match khelh a ni dawn, anni hi 2026 World Cup khel tur an ni. US president thlan thar Donald Trump pawhin Club World Cup draw hi a hriatpui a, video kaltlangin inelna hmachawn tur te duhsakna a hlan.

Donald Trump-a fanu Ivanka chuan draw an neih lai hian team hmasa ber tur a pawt bawk a ni. US rama inkhel tur an ni a, Major League Soccer club Inter Miami chu an inlan dawn - Lionel Messi telna team hian inelna match hmasa ber atan Hard Rock Stadium-ah Egyptian club Al Ahly an hmachhawn ang.

Football khawmualapui paruk aṭangin team an inlan dawn - Europe chu club ngah ber ni in team 12 an inlan ang a, khawmualpui pakhat aṭanga team nei tam thei ber an ni.

Europe aiawh turte hi tun hnai season li chhunga Champions League an khelh dan aṭanga chhut a ni a, champion hlui pathum Chelsea, Manchester City leh Real Madrid te chu an tling nghal a ni.

Khawmualpui dang aṭang chuan an club sulhnu nei ṭhate an inlan dawn a, a thlengtu ram chuan team pakhat an nei thei a, Inter Miami hi a thlengtu an nih avanga inlan an ni.

Inter Miami hi MLS regular season champion an ni a, playoff an khelh zawh hmain FIFA president Gianni Infantino chuan Inter Miami inlan thei tur thu hi a puang fel der tawh a ni.