La Liga a 'hot' thar leh ta!

Barcelona-in 4-0 a Real Madrid an sawp meuh kha chuan champion tur ang hialin Catalan club hi sawi rik an ni a, Espanyol 3-1 a an sawp zui nghal bawk avangin La Liga nomawi chu an ta chei nghal a ni ber!

Mahse, Barca fan-te an uang hma hret a, hnehna hlado an chham ring hma hret - league match thum a zawnin an chak zo lo zui a, Real Sociedad (1-0) leh Las Palmas (2-1) ngam loin, Celta Vigo (2-2) lakah an chak zo lo bawk.

Hetihlai hian Real Madrid erawh Barcelona an ngam loh hnua league match thumah an chak vek a, Osasuna (4-0), Leganes (3-0) leh Getafe (2-0) an hneh vek - Real-in Barca an hnaih sawt a, league nomawi inum boruak a 'hot' sawt.

Mahse, kar laklawhah khan team pahnih an inlan - Barcelona-in 5-1 ngawta Real Mallorca an sawp laiin, Real erawh Athletic Bilbao (2-1) lakah an tlawm mauh a! Team pahnih inkarah point khat chauh a awm leh ta a, kartawp league-ah an inlan ve ve dawn.

Inthlauhna chu

Zanin dar 8:45-ah Barcelona-in Real Betis an lenchilh dawn a, an chak chuan point sarihin Real an tlansan thei dawn. Mahse, zanin dar 1:30-ah Real-in Girona chu khualmualah an lenchilh ve lehnghal dawn a, Barca nena an inkar sawr zim turin hun remchang a awm nghal dawn tihna a ni.

Barcelona hian league match 16 an khel tawh a, Real-in 15 an khel tawh thung. Real hian Barca khelh zat khel se, chak bawk se, point khat chauhin Catalan club hi an thlau dawn tihna a ni a, team pahnih inkar hi a zau lo hle.

Hetihrual hian Atletico Madrid theihnghilh an thiang bik lo - Diego Simeone-a naute hi league table-ah pathumna an ni mek a, hmahruaitu Barcelona an thlauhna hi point nga chiah a ni a, match khatin an khel tlem bawk.

Atletico hi Barcelona leh Real Madrid result hre sain an inlan dawn a, Pathianni zan dar 1:30-ah Sevilla an mikhual ang. A tawi zawnga sawi chuan Spain-ah champion thei pathum an awm a, an inkar a zim hle.

Barca harhna

League match thum a zawna an chak loh meuh kha chuan Barcelona ṭantute an nguai hman a, Hansi Flick-a hnuaia beiseina ropui tak an neih pawh a thamral hman teuh hle. Mahse, Lamine Yamal a lo kir meuh chuan Barca an kang zawk a, goal nga an khung nghal!

Zaninah pawh Betis hi hneh an duh a nih chuan Barca rawlthar duhawm chet ṭhat a ṭul a, captain Raphinha a ṭangkai leh dawn bawk - Raphinha hian tun season-ah match 21 khela goal 16 khungin, assist vawi 10 a nei tawh.

Flick-a'n Mallorca lakah Robert Lewandowski chu bench-ah dahin, a aiah Ferran Torres a luhtir a, Manchester City forward hlui hian goal a khung zui. Mahse, Polish striker hi match zawna bench-a dah a harsa mai thei.

Kum 36 mi Lewy hian tun season inelna hrang hrangah match 20 khelin goal 22 a khung tawh a, assist vawi hnih a nei. Yamal pawhin match 18-ah goal ruk leh assist vawi kua a nei a, Betis tan chak turin Yamal, Raphinha leh Lewy dan chah dan ngaihtuah a ngai ang.

Real buaina

Vinicius Junior a inhliam avangin Real tlarhmaah Kylian Mbappe mawhphurhna a sang lehzual a, mahse, a hlen thei meuh lo! Real hian Vinicius awm loh hnuah inelna hrang hrangah match thum an khel a, vawi khat chiah an chak.

Match thumah hian penalty an hmu vek a, Jude Bellingham-a'n vawi khat petin a chhuih goal a, an chak bawk. A dang pahnihah Mbappe hian pet ve vein, a pet goal lo ve ve a, an tlawm ve ve bawk.

Coach Carlo Ancelotti-a'n Mbappe a chhan a ngai hial a, Italian coach hian a player chu a ṭhat dan bera a la khelhchhuah loh thu sawiin, "Insiamrem tura hun kan pek a ngai a ni," a ti - Real-ah player innghahna ni turin Vinicius awm loh laia goal a khung tam a ngai!

Bellingham 'form' leh ta hi Real tan lawmna tur pakhat a ni tel a, Barca hnaih turin Bilbao lakah an hun ṭha neih an bawhpelh tawh a, zaninah Girona laka an bawhpelh leh a nih chuan coach Ancelotti hma hun a ngaihtuahawm ang!