Verstappen tih nat ka tum lo - Russell

Pathianni zan dar 6:30 hian Formula 1 Abu Dhabi Grand Prix an tlan dawn, tun season atan Max Verstappen champion chiang tawh mah se, tun hnaia thil thleng vangin car intlansiakna sang hian ngaihven a hlawh zual.

Intlansiak an neih hnuhnung ber Qatar Grand Prix-ah khan Max leh Russell te an inbakkaih a, intlansiak zawh hnuah Red Bull driver Verstappen chuan amah tih nat tum leh che mawi loah Russell chu a puh.

Tunah chuan Yas Marina Circuit an lut dawn a, anni pahnih hi mipui hmuh chak an ni. Mercedes driver George Russell chuan, "Mimal inbeihna anga a la tlat kha mak ka ti, kei chuan Max kha tih nat luih ka tum lo.

"Intlansiakah theihtawp kan chhuah a, chet fuh loh chang awm mah se a hnu lawkah boruak a ṭha leh mai ṭhin. Tun hnaia thil a thlen hnu lawk pawh khan Sergio Perez leh Carlos Sainz te nen chuan kan nui ho leh mai," a ti.

Pathianni zan intlansiak hi tun season hmawr bawkna a nih avangin thil tam tak a liam pui dawn. A liam pui tur zingah Lewis Hamilton leh Mercedes thawhdunna hnuhnung a ni tawh dawn, season thar aṭang chuan Hamilton hian Ferrari car a khalh dawn a ni.