Copa del Rey-ah Atletico an chak

Atletico Madrid chuan Copa del Rey last 32 thleng turin Cacereno chu 3-1 in an hneh. Diego Simeone hote hi Spanish fourth division club lakah an talbuai a, a tawpah hnehna an chang hram.

Principe Felipe-ah mualneitu tan Alvaro Merencio-a'n minute 30-naah a khung a, Atletico-in a chhanletna an nei mai lo. Minute 83-naah Clement Lenglet hmangin an sut chauh a, Cacereno player Jaime Gonzalez chu minute hnih hnuah hnawhchhuah a ni.

Player 10-a khel Cacereno lakah Atletico tan Adrian Guerra leh Julian Alvarez ten injury time-ah an khung belh. Argentine forward Alvarez hian Atletico tan inelna hrang hrangah goal 11 a khung tawh.

Spanish team ṭha pali Athletic Bilbao, Barcelona, Mallorca leh Real Madrid te kumin Copa Del Rey-ah an la inlan lo a, last 32 aṭangin an khel ṭan ang.