Bundesliga-a insawr bing mamawh Bayern

Bayern Munich-in season liam ta khan nomawi an chawi lo a, tun season-ah nomawi chawi an duh a nih chuan Bundesliga-ah insawrbing an mamawh. Vincent Kompany hote hian zanin dar 8:00 hian Heidenheim an mikhual dawn.

Bavarians hian kar laihawlah Bayer Leverkusen 1-0 in an hneh lo a, DFB Pokal-ah an beiseina a tawp. Kompany hote tan Champions League-ah beiseina la awm bawk mah se champion rinkai an ni lo.

Bayern tana nomawi chawi theihna awlsam ber chu Bundesliga a ni a, match 12 khelh tawh aṭangin point 30 hmuin hmahruaitu an ni mek. Chutihrualin Bundesliga-ah pawh an match hnuhnung berah Borussia Dortmund nen an inhnehtawk.

Kompany hian hliam vangin Harry Kane an chhawr thei dawn lo a, Thomas Muller-a'n mawphurhna a rawn lak theih a pawimawh ang. Heidenheim erawhin pressure nei loin Bayern an hmachhawn dawn a, chutihrualin point hlawh chhuak tur chuan tlarhnung a phui ṭha a pawimawh khawp ang.

Champion lai Bayer Leverkusen-in zanin dar 8:00-ah FC St Pauli an mikhual ang a, dar 11:00-ah Borussia Dortmund-in Borussia Monchegladbach an hmachhawn bawk ang.