Vawiin aṭangin Paragliding Accuracy C'ship ṭan dawn

Nimin khan International Paragliding Accuracy Championship 2020 hawnna Tourist Lodge, Serchhip-ah neih a ni a. Mizoram sorkar leh Mizoram Aero-Sport Association (MASA) buatsaih inelna hi vawiin aṭangin inelna ṭan a ni ang a, a kharna hi February 15, Inrinniah neih tur a ni.

Paragliding Accuracy Championship-ah hian India ram aṭangin Sikkim leh Arunachal Pradesh bakah inelna thlengtu Mizoram te an tel dawn a, ram pawn aṭangin Slovenia, South Korea, Kazakhstan, Afghanistan leh Macedonia te an tel dawn. China aṭanga mi pasarih kal tur chu 'coronavirus' vangin an ṭhulh a, tun ṭum inelnaah hian 'pilot' 65 vel tel turin an beisei.

Inelna hi World Cup tia sawi zet a ni a, harsatna a awm tak avangin a rem leh ta lo. Hemi chungchangah hian MASA chuan, "World Cup buatsaihtu Paragliding Accuracy World Cup Association (PGAWCA) in Germany-ah hming chhiatna an nei a, Aero Council of India (ACI) chuan India rama inelna buatsaih an remtih sak lo," tiin an sawifiah.

Pilot-te hi Bawngchawm chuan hnuai ram aṭangin an thlawk chhuak ang a, Zawlpui mat phaiah an ṭum ang. Bawngchawm san zawng hi 1,100 metres a ni. Pilot pakhat hi ni khatah vawi hnih zel an thlawk ang a, ni thum chhungin vawi ruk an thlawk dawn. Accuracy C'ship a nih ang hian pilot te hi ṭumna tur bik siam sak an ni a, an ṭum ṭhat dan a zir zelin point pek tur an ni.

Mi nawlpui tan pawh paragliding tem chhinna hun siam sak a ni dawn a, pilot pakhatin mi pakhat zel a phur dawn. 'Tandem joyride' hi tun ṭuma inelna denchhen hian tih tlawm a ni dawn a, Rs 2,000 chawiin a chuan ve theih ang.