Mizo inchai title fight hun a thleng: Palaihawl title fight kan hmu nghal dawn

Mizoram Wrestling Association buatsaih Mahindra XUV3XO Mizo Inchai Title Fight 2024 chu zanin aṭangin LPS Arena, Falkland Vengah neih ṭan a ni dawn a, inchai hi zan thum chhung neih tur a ni ang.

Zan hmasa berah hian palaihawl leh nulaihawl ten title an inchuh dawn a, inchai hi a hmunah en theih a ni dawn a, mahni in lum aṭanga en duh tan LPS 1 leh LPS YouTube lam aṭanga en theih a ni dawn bawk.

Palaihawl champion lai Remruatpuia chuan a title kawl lai humhim ngei a tum tih a sawi. Remruatpuia chuan, "Pathian zarah ka khingpui tur hi ka huphurh hran lo," tiin Vanglaini a hrilh a, a hmachhawn tur Ngursangzuala lakah a inringtawk hle.

Remruatpuia leh Ngursangzuala te hi Saitual naupang ni ṭhin ve ve, naupan lai aṭanga inhre tawh an nih avangin an inhrechiang dawn. Kum 2023 khan wrestling pangngaiah an inchai a, hemi ṭum hian Puipuia hi a chak, chak nawn leh a tum dawn a ni.

Champion lai chotu Ngursangzuala a zam bik lo, title an inchuh tur chuangchang sawiin, "Cho dan chi kim ka cho a, a theih chuan bawhbeh ka tum ang," a ti. Inchaina hmunah chuan hmelhriat leh ṭhian ṭha sawi a rem dawn lo, chak zawk nih ngei a tum ruh hle.

Bethlehem Vengthlanga inbengbel ta Remruatpuia chuan, "Kei pawhin cho chi kimin ka cho tawp a ni mai. Ka bawhbet ang a, ka chawi kang bawk ang a, a bawkkhup zawngin ka bawhbet bawk ang a, a chi kimin ka bawhbet ang," a ti.

Nulaiahawl huangah champion lai Elizabeth Rohlupuii chuan amah chotu Penticost Lawmsangpuii lakah a title kawl lai hloh a tum lo. Melriat nula Elizabeth-i chuan, "Round zawng zawngah bawhbeh ka tum a, champion kawnghren hi ka humhim ang," a ti.

Champhai nu Penticost Lawmsangpuii a zam bik lo a, champion nih a tum thu sawiin, "Ka cho a, bawhbeh ka tum a, ka bawhbeh zat tur chu ka hre lo," a ti. A zan khatna aṭangin inchai a hmunawm nghal dawn hle a ni.

Title fight pahnih bakah hian Freestyle Wrestling (Exhibition) en tur a awm dawn bawk. Mahindra XUV3XO Mizo Inchai Title Fight 2024 hi Thawhlehni leh Nilaini zanah chhunzawm leh tur a ni ang.