Vawiinah Inter Village Football 2024 semifinal: Kolasib Jt vs Melbuk; Ramhlun North Vs Tlangnuam

MFA buatsaih GIG Motors Inter Village Football 2024 semifinal chu vawiin hian khelh a ni dawn. Tlai dar 3:00-ah Aizawl khaw pawn team pahnih Kolasib Jt leh Melbuk te an inkhel ang a, zan dar 7:00-ah Ramhlun North leh Tlangnuam te an inkhel ang.

Tlai lama inkhel tur hi Aizawl khaw pawn team ṭha pahnih an ni a, semifinal an thlen chhoh dan thlirin Kolasib hi champion tura rinkai ber ni tawh mah se Melbuk hi chet sual theihna an ni. Zan lama inkhel tur erawh team intluk tawk an ni a, chak tur hriatthiam a har hle.

Kolasib thawm a ring

Kolasib hian match li khel tawhin goal an la chhuah miah lo a, goal 34 ngawt an khung tawh. Lalchhuansanga hote hian Sakawrtuichhun (21-0), Mission Veng (5-0), Republic Veng (5-0) leh Bethlehem Vengthlang (3-0) te an hneh a, club football khelh atana mawiin football game mawi an khel chhuak.

ISL club Odisha FC midfielder Paul Ramfangzauva chu midfield khaipa a ni a, tlarhnung aṭanga ball sem chung siin a hunah a tlan chhuak tho - goal sarih ngawt a khung tawh. Kolasib dan an harsatna chhan pakhat chu tlarhma lam an ṭhat vang a tih theih bawk.

William Lalnunfela'n number 9 hna a chelh a, Kerala United captain hian midfield a thlawp ṭha. Isak Malsawmkima, RM Zothansanga leh PC Pazawna te hi team chakpui vek thei an ni a, Melbuk tan hna a hautak dawn.

Chutihrualin Melbuk hi Mizo coach tawnhriat nei ṭha F. Lalrozara enkawl an ni a, RG Stadium bulah an thlen bawk avangin Kolasib khelh dan a zir uluk tawh khawp ang. Melbuk hian Zanlawn (4-0), Saikhamakawn (5-1), Phunchawng (12-0), Durtlang (1-1, Pen 5-4) leh Armed Veng (0-0, Pen 5-4) te an hneh.

Match hnuhnung pahnihah penalty-ah an chak a, hei vang hian penalty shootout thlen pawh pawi an ti lo ang. Kolasib tan erawh penalty hmachhawn hi a châkawm loh, BVT lakah an thiampuipa Paul-a'n penalty a hlah.

Chutihrualin Melbuk hian tlarhma an nei ṭha a, goal riat khung tawhtu Lallawmsanga (LS-a) bakah Lalbiakmuana, Lalsawmzela, Lalthanzuala leh Robena te an kawl a, Kolasib an nawr ngam a nih chuan inkhel a hmuhnawm phah khawp ang.

Tlangnuam nge Ramhlun N

Tlangnuam leh Ramhlun North ten semifinal an thleng hi tualchhung football hrechiang lo tan chuan thilmak a tling thei ang a, mah se veng pahnih hi tun hnai kum hnih chhunga football/futsal-a sum hmanga nasa zinga mi an ni.

Tlangnuam hian CYMA Football 2023 final an thleng a, futsal lamah team nung ṭha tak an nei bawk. Tun hnaia futsal sawiselna karah futsal leh football a kal kawp thei tih lantirtu an ni.

Coach Francis Vanlalpeka kaihhruai team hian Bairabi Jt (5-1), Ramhlun South (6-1), Tlangmawi (4-3), Sihphir Venghlun (4-1) leh Lengpui (3-1) an hneh a, an result aṭangin team ṭha an nihzia a lang. Hei bakah hiah Vincent Lalduhawma leh M. Lalpektluanga te hi danglamna thlen thei player an ni.

Ramhlun North hi tualchhung football hrechiangtu H. Lalremruata enkawl an ni a, ani enkawl chu MPL emaw First Division emaw pawh ni se Mizo player a hriat chian avangin team ṭha zinga mi an ni zel.

Remruata hote hian Sairang Jt (4-2), Chanmari (3-2), Chanmari West (5-3) leh Bawngkawn (1-1, pen 3-1) te an hneh. Tlarhmaah Mizoram Police forward F. Lallawmkima (goal 2) a pawimawh a, goal li khung tawhtu Lalnunsanga bakah midfielder ni chunga goal thum khung thei Lalremtluanga te an pawimawh viau bawk.

Semifinal a ni tawh a, player an intluk tawk avangin entu an pawimawh dawn. Zan inkhel a nih avangin entu lam tan pawh inkhel en tura hun insiam a harsa lo tura ngaih a ni.