Forest lakah United an tlawm
Ruben Amorim an neih avanga beiseina nei thar Manchester United chu an hliamah chi phul belhsak an ni a, Inrinni zan khan phur takin Nottingham Forest mikhual mah se 3-2 in an chak lo.
Old Trafford-a inkhelah mikhual Forest tan Nikola Milenkovic, Morgan Gibbs-White leh Chris Wood ten goal khat ṭheuh an khung a, mualneitu tana Rasmus Hojlund leh Bruno Fernandes te khungin United a chhanhim zo lo.
Inkhel tir lamah Man United an che fuh lo, match hmasa lama an buaina ngai corner bawk chu an harsatna a ni. 6ft 5in zeta sang Nikola Milenkovic chuan chiang lutukin a tauh lut a, an hlim chhung erawh a rei bik lo thung.
Man United an insiamṭha nghal a, na takin an nawr let nghal - captain Fernandes-a'n ball fing a pe chhuak a, striker awmna tur hmuna awm Hojlund-a'n a lo chang fuh nalh bawk, coach thar Amorim leh a naute an phur.
Mahse, a hnu lamah Man United tlarhnung a nghing nasa a, goalkeeper Andre Onana-a'n ho lam takin Morgan Gibbs-White-a pet a chhuah bakah Wood a inlar zui bawk, goal thum an chhuah hnuan Fernandes goal khung mawi viau mah se kawngro a su phak ta lo a ni.
Forest nen an inkhelh hmain Amorim chuan Man United chu club ropui tak ni mah se, tuna an team chu a ropui rih lo tih a sawi a, team nghet leh khauh nei tur chuan hun a mamawh dawn. Portuguese manager chuan, "Sporting a ka hun hmasa lam pawh kha a harsa.
"Tun ang tho hian a bul ṭan lai kha a awlsam lo, mahse Portugal leh England chu football khawvel hran daih a ni, hetah chuan mi ten kan chevel engkim min ngaihven," a ti a, boruak ritin a delh tih chu phat theih a ni lo.
Amorim hian an goal keeper Onana chungchang sawiin, "Min chhanhim fo tawh a, tihsual palh chu a awm thei. Tuna kan chak lohna hi mimal ni loin team chak lohna a ni," a ti a, mimal ni loin team chu hmasawn ngai an ni tih a sawi.
Inrinni zan inkhel dangah Newcastle United an chak lo ve bawk a, an mikhualna ramah goal li ngawt chhuahin Brentford lakah 4-2 in an tlawm. Eddie Howe-a naute tan season thara Champions League khelh beiseina a zuih chho mek.