Tho hlen thei lo Manchester City

Manchetser City-in inelna hrang hrangah match sarih zet a zawna an chak loh hnuin kar hmasa khan Nottingham Forest an hneh a, Pep Guardiola leh a naute tho leh tura ngaihna lian tak a awm hman.

Mahse, beisei leh a tak ram chu inthlau tak a ni. City-in kartawpah league match khelh chhunzawm lehnghalin, an mikhualna ramah Crystal Palace hi an hneh zo lo, 2-2 in an inhnehtawk.

Palace hian Daniel Munoz leh Maxence Lacroix hmangin vawi hnih ngawt hma an hruai a, City zawkin comeback an mamawh - Erling Haaland leh Rico Lewis hmangin an chhanglet a, Rico hian red card a hmu bawk!

A umtu City

Palace-in mikhual City lakah chak an tum ngam a, goal an khung hma - minute lina lekah Will Hughes chuan Munoz tan a siamsak a, goal-ah a chantir nghal. Pep leh a naute an hawihai hma hle.

City-in chak tumin an nawr let a, tun hnaia beisei anga goal khung thei lo Erling Haaland chuan minute 30-naah si phurh a sut a, mahse, minute 56-naah Lacroix-a goal hmangin Palace-in an khung belh leh a, 2-1 a ni der.

Hei hi inkhel tawpna erawh a ni lo. Bernardo Silva siamsak chu Rico Lewis chuan minute 68-naah khungin si phurh a sut. Mahse, si phurh suttu ber hian minute 84-naah red card a hmu zui a, 2-2 in inkhel a tawp hram.

City an chuai

Kum 34 mi Kyle Walker-a'n sawiselna a tawk nasa a, a vanglai a liam ve ṭan mek tih hai rual a ni lo - Munoz a veng hneh zo lo a, an goal hnihna chhuah dan lah Lacroix a ven hneh zawh loh vang a ni a, a tiholam hret.

A vawi thum nana Ederson aia thlan Stefan Ortega pawh a chesual a, goal chhuah hmasak zawk kha chu chetsual lohna chi a ni! Ruben Dias a khel ṭha a, Portugese defender hi awm lo se, City hian goal tam zawk an chhuah hial ang.

Hun tawp nan minute ruk chauh a awm tawh tihah Roca Lewis chu hnawhchhuah a ni a, yellow card pahnih a hmuh vang a ni. A tirah referee a zah loh avangin warning pek a ni a, minute 84-naah yellow card pahnihna hmuin hnawhchhuah a ni ta a ni.