Barca chak zawh loh zanah Real an chak

La Liga pawh a ngaihnawm zel - Inrinni zan khan hmahruaitu Barcelona chu Real Betis khelmualah an chak zo lo a, vawi hnih ngawt hma an hruai hnuah an sut tir zel avangin 2-2 in inkhel a tawp.

Barcelona hian Robert Lewandowski leh Ferran Torres hmangin vawi hnih ngawt hma an hruai a, mahse, Giovani Lo Celso (penalty) leh Assane Diao goal hmangin Betis hian an chhanglet a, team pahnihin point an insem.

Girona khelmuala hnehna chang turin Real Madrid-in harsatna an tawk lo a, Jude Bellingham, Arda Guler leh Kylian Mbappe ten goal khat ṭheuh khungin, khualmualah 3-0 in an chak.

Barca chak zawh loh thu hre saa inlan Real-in hnehna an chang a, point hnih chauhin Barca an thlau tawh - match khatin an khel tlem zawk bawk a, La Liga-ah hmahruaitu ni tura inum boruak a 'hot' chho zel.

A tirah Barca!

Barca-in Betis an lenchilh hmaa league match an khelh hnuhnung paliah vawi khat chiah chak an nei a, Real-in an hnaih hman hle - mahse, kartawp inkhelh hmain Real Madrid an tlawm a, Barca fan-te an phur phah hle.

Inrinni zanah Real inlan hmain Barca an inlan a, hmahruai fal theihna remchang an nei. Mahse, Betis khelmualah Barca an talbuai a, minute thum chhungin vawi hnih ngawt goal chhuah thei dinhmunah an ding hman.

Raphina chuan Diego Llorente tauh goal tur nia lang chu goalline aṭangin a lo 'clear' hman a, Abde Ezzalzouli chance neih chu Inaki Pena chuan ṭha zetin a dang bawk.

Lamine Yamal chuan hnai set sawtah uiawm takin goal chance a hlah a, Lewandowski erawh a chesual ve lo - Polish striker hian minute 39-naah Jules Kounde siamsak chu goal-ah a chantir a, 1-0 a ni.

A tawpah Betis

Second half-ah thatho zawkin Betis an inlan a, si phurh an sut nghal teuh hle. Mahse, Sergi Altimira, Lo Celso leh Chimy Avila ten an chance neih an chhawr lo vek a, si phurh sut turin penalty an mamawh.

Barca substitute Frenkie de Jong chuan Barca player, Betis-a loan-a khel Vitor Roque chu titluin penalty a chawi a, Lo Celso chuan harsatna nei loin goal-ah a chantir.

Mahse, Catalan club-in chak an tum a, an ṭang hle. Torres chuan Betis offside trap bumin, Lamine Yamal-a siamsak chu goal-ah a chantir a, minute 82-na a nih tawh avangin Barca hi an chak mai a rinawm tawh.

Barca beisei ang erawhin thil a kal vek lo - hun pek belh minute linaah kum 19 mi Diao chuan si phurh sutna goal a khung a, mikhual team tan goal dang khung leh turin hun a awm tawh lo.

Real an chak

Carlo Ancelotti nauten Barca chak zawh loh thu hre saa tlawm an duh lo a, Girona khelmualah goal thum ngawt an khung - Real tana chanchin lawmawm chu Bellingham leh Mbappe ten goal an khung ve ve kha a ni ang.

Season ṭantir lama sawisel hlawh tak Bellingham hian minute 36-naah goal hmahruai a khung a, league match nga a zawna goal nga a khungna chiah niin, Real player zingah Karim Benzema hnua (March - April 2021) league match nga a zawna goal khung leh thei hmasa ber a ni.

Bellingham hian amaha goal khung mai duhtawk loin, minute 55-naah Arda Guler-a khung tur a siamsak zui a, amah sawiseltute a chhang zel - Bellingham hi hliam vangin lakchhuah a ngai zui a, mahse, coach Carlo Ancelotti chuan a dinhmun a ṭhat thu a sawi.

Real lawmna belhchhah turin, tun hnaia sawisel hlawh tak Mbappe chuan goal khung dan a la theihnghilh lo tih pholangin, minute 62-naah chak nemnghehna goal a khung a, Barca an um zel.