Tar tum ve lo Sunil Chhetri!

Kum 40 mi ni tawh mah se, Sunil Chhetri a la tar ve lo - Bengaluru striker hian Inrinni zan khan Kerala Blasters lakah hattrick a siam a, Bengaluru chu an mikhual team lakah hian 4-2 in a chakpui.

Bengaluru hian Chhetri leh Ryan Williams hmangin 2-0 in hma an hruai hman a, mahse, Blasters hian Jesus Jimenez leh Mizo tlangval Freddy Lallawmawma hmangin an chhanglet a, 2-2 a ni.

Mahse, Bengaluru-in Blasters neih ve loh an nei a, a hming chu Chhetri a ni. India captain hlui hian goal hnih a khung leh a, hattrick siamin Bangalore a chakpui.

Chhetri tan tun season match 11-a goal riat a khungna chiah a ni a, assist vawi khat a nei. Bengaluru tan hian midfielder Lalremtluanga Fanai chu bench aṭangin a lut.

Hetihlai hian East Bengal chuan tun season-a khualmuala an chak hmasak ber ni turin Chennaiyin chu 2-0 in an hneh a, PV Vishnu leh Jeakson Singh ten goal khat ve ve an khung - PC Laldinpuia, Laldinliana Renthlei leh Lalrinliana Renthlei ten Chennaiyin tan inkhel bul an ṭan a, an team erawh an chhan zo lo.

Punjab FC pawhin ISL-ah a tikimtu mai an ni lo tih an pholan chhunzawm zel a, Zirtawpni zan khan Mohammedan SC chu Luka Majcen leh Filip Mrzljak goal hmangin, 2-0 in an hneh - Mohammedan tan hian Zodingliana Tochhawng, Joe Zoherliana leh Lalremsanga Fanai ten inkhel bul an ṭan.