Musiala-'an Bayern a chakpui

Bundesliga-ah Bayern Munich chuan Heidenheim 4-2 in an hneh a, Allianz Arena-a inkhelah Jamal Musiala a khel ṭha hle. Bavarians hian match 13 aṭangin point 33 an hmu a, anmahni hnaih bertu Eintracht Frankfurt aiin point rukin an hmu tam zawk.

Inrinni zan inkhelah Bayern-in Harry Kane chhawr thei lo mah se goal khung erawh an harsat lo. Minute 18-naah Joshua Kimmich-a'n corner kick pet chu Dayot Upamecano-a'n a tauh lut nghal. Mualneitu hi chungnung mah se first half-ah goal a luh belh lo.

Second half-ah goal hmahruai khungtu Upamecano-a'n a back pass sual a, Mathias Honsak-a'n a hun ṭha neih hi minute 50-naah goal-ah chantir. Heidenheim-in siphurh hnuah point hlawhchhuah beiseina nei mah se Musiala an ngam lo zui.

Bayern midfielder hian minute 56-naah vei lam aṭanga khalh lutin box chhung chiah aṭangin a pet goal a, minute 84-naah Leroy Sane pass Leon Goretzka-a'n kawh zetin box pawn aṭangin a pet lut.

Bavarians tlarhnung a phui tawk lo a, minute 85-naah Niklas Dorsch-a'n siphurh a sut ṭhen a, mualneitu lam nuam sa takin an awm hman lo. Mahse, injury time-ah Bayeryn-in an vaw let a, ball um luttu Musiala finishing a tawih avangin 4-2 in an chak.

Bayern hneh bertu Eintracht Frankfurt chu Augsburg nen 2-2 in an inhnehtawk a, hei vang hian point ruk ngawtin Vincent Kompany hoten hma an hruai fal tawh. Champion lai Bayer Leverkusen-in St Pauli 2-1 in an hneh a, pathumnaah awmin point sarihin Bayern an pha lo thung.