Merseyside derby khelh hun sawn

Inrinni zana Everton leh Liverpool inkhel tur chu thlipui 'Storm Darragh' an tih avangin khelh theih a ni lo a, Merseyside derby hi a khelh hun sawn a ni - he thu buatsaih a nih lai hian an khelh hun tur tarlan a la awm lo.

English football-a club inhal tak pahnih inkhelh hma hian thlipui tleh tur thu hi hriat lawk a ni a, hemi a nih avang hian club pahnih aiawh, Merseyside Police leh Liverpool City Council te chu inrawnkhawmin, league match hi khelh rih loh mai turin thutlukna an siam ta a ni.

Everton chuan thu-chhuah siamin, "Football ngainatu, inkhel en châkte tan chuan thu lawmawm lo tak a ni ang tih kan rin rualin, fan-te, staff leh player-te himna hi kan ngaih pawimawh ber a ni si a ni," an ti.

Liverpool pawhin thuchhuah siam vein, "Liverpool chhehvela harsatna thleng thei thlirin, inkhelh hun sawn mai hi a ṭha zawk a ni," an ti - Reds hian Premier League-ah point sarihin hma an hruai fal mek a, mahse, nizanah Arsenal leh Chelsea ten match an neih avangin, he thuziak i chhiar meuh chuan Reds sanna hi a danglam tawh mai thei.