FIFA buaina CONCACAF secretary hlui Chuck Blazer-a inpuang

Khawvel football-a thuneitu sang ber FIFA buainain zual lam a pan zel a, tunhnaia an hruaitu ṭhenkhat eiruk thubuaia an man hnu lawkin Eastern New York District Court hmaa FIFA executive committee member hlui Chuck Blazer-a inpuanna chu tihchhuah a ni. Blazer hi 2013 khan eiruk thubuai siamsak a lo ni tawh.

US Soccer Federation vice president hlui hian kum 2010-a South Africa-in World Cup a thlen theihna turin thamna sum leh pai an lak thu a sawi a, kum 1998 World Cup-ah khan thamna sum a chelek kual thu a sawi bawk.

North leh Central America-a football thuneitu sang ber CONCACAF general secretary pawh lo ni tawh Blazer chuan, "Kum 2004 aṭanga bul ṭanin kum 2011 thleng khan kei leh FIFA executive committee-a ka thawhpui tam tak chuan kum 2010 World Cup pual khan thamna sum tam tak kan dawng a ni," a ti.

Kum 70-a upa Blazer chuan, "Kei leh ka thawhpuite chuan 1996, 1998, 2000, 2002 leh 2003 Gold Cup (North America khaw­mualpui inelna) ah te khan TV lama pekchhuahna leh thil dang dang aṭangin thamna sum kan la char char a ni," tiin thamna sum an lak nasat thu a sawi bawk.

Blazer hi eiruk thubuai leh a kaihhnawih thubuai chi hrang hrang sawmah thiam loh chan tir vek a ni a, kum 2013 daih tawha a inpuanna tuna tihchhuah a nih chhan hi FIFA chhungkuaa eirukna thubuai chhui chhunzawm tura US investigation team-in thawhpui tura an sawmna a pawm vang a ni. Tuna thubuai tam tak US justice department-in an hmuchhuah theih chhan pawh hi amah vang a ni pakhat. Tunah hian cancer natna avangin a dam lo na hle.

Tunhnaia US Justice depart­ment-in eiruk thubuai an siamsak FIFA nena inkaihhnawihna neite hi an vai chuan 14 an ni a, mi pasarih man an ni tawh. Thubuaia tarlan dan chuan heng thubuai siamsakte hian kum 24 chhungin thamna sum dollar maktaduai 150 chuang an la a ni.

South Africa an ṭang na

2010 World Cup an thlen theihna tura thamna sum dollar maktaduai 10 zet thehchhuak anga an sawina chu South Africa chuan an pha nasa hle.

US Department of justice-in an tarlan dan chuan South Africa hian Fifa vice-president hlui Jack Warner bakah CONCACAF-a hruaitu ṭhenkhat chu World Cup an thlen theih nana pui turin thamna sum dollar maktaduai 10 an pe a ni.

South Africa sports minister Fikile Mbalula chuan sum leh pai chu Caribbean khawmualpuia football hmasawn theihna tura seng an nih thu sawiin thamna sum chelek anga puhna chu a pha nasa hle.

Mbalula chuan na takin USA a khak bawk a, khawvel police emaw an inti a ni tiin an inrawlh lohna tura inrawlhah a puh.

Fikile Mbalula chuan, "Tuna min puhna avang hian kan hnungtawlh lo. World Cup zahawm­na leh kan ram hmel mawina hi kan kut a innghat a ni tih kan hria a, theihtawpin kan bei zel ang," a ti bawk.

Russia an kal zel dawn

2018 Russia World Cup leh 2022 Qatar World Cup thlen danah dik lo awma ngaiin Swiss Court-in an chhui chiang dawn a, heti chung hian Russia chuan World Cup thleng tura an inpuahchah reng thu an sawi.

Russia Olympic Committee hotupa Alexander Zhukov chuan, "Tuman kan World Cup thlen tur hi an boycott loh kan beisei. Politician leh mi hrang hrangin an ngaihdan kan World Cup thlen chungchanga an sawite kan hmu cham chi a, mahse sport hi inṭhen hran emaw a keh darh hi tuman an phal ka ring lo. FIFA nena kan thawhhona pawh a kaltluang a, a pawimawh ber chu World Cup thleng turin Russia hi a inpuahchah zel a ni," a ti.