Chelsea hlim zanah Arsenal an ngui

Premier League champion tum ngam Chelsea chuan goal hnih an phurh hmasak hnuah Tottenham Hotspur chu 4-3 in an lehthal a, hmahruai mektu Liverpool nen an inkarah point li chauh a awm ta.

Pathianni zan inkhel dangah Arsenal erawh Fulham nen 1-1 in an inhnehtawk - Mikel Arteta naute tan EPL nomawi a hla leh ta rih - Manchester United an hneh avanga an phur lai tak ni mah se an hlim chhung a rei lo.

Chelsea an mawi

Tottenham Hotspur Stadium-a inkhelah mualneitu lamin Dominic Solanke leh Dejan Kulusevski ten goal an khung hmasa, goal pahnih a luh dawn hian Chelsea defender Marc Cucurella a tawlhtlu a, anmahni lama goal lut lai a en a ngaih phah.

Enzo Maresca naute an duai duh bik lo - Jadon Sancho-a goal ṭha zet hmangin an sut ṭhen a, England international hian goal a khung bakah penalty an hlawh chhuah theih nan a thawh hlawk hle - Cole Plamer chuan penalty aṭangin a sut zo.

Palmer-a'n box sir lamah inringtawk tak maiin ball a chhaih vel a, a duh ang takin ball pe chhuak lo mah se a pet chu Enzo Fernandez-a'n laklawh nei miah lohin a lo hlap lut, a hnuah Palmer chuan penalty a khung belh bawk.

Spurs captain Son Heung-Min-a'n a hun ṭha hmasa hlah mah se, hun tawp dawnah erawh an beiseina ti nung thar turin goal a khung a, mahse hun a chep tawh lutuk avangin North London club tan thawhchhuahna hun a awm tawh lo.

Fimkhur a ngai

Inkhelh banah Chelsea manager Maresca chuan fiamthuin, "Kan elpuite hi Marc Cucurella angin an tawlhthlu lo ang," tiin a sawi a, an chunga awm Liverpool bakah an hnuaia mi Arsenal leh Manchester City te lakah fimkhur a ngaih thu a sawina a ni.

Italian manager Maresca chuan sawi zawmin, "A nihna tak sawi ila ka beisei phak baka ṭhain kan khel, kan inkhelh dan phung leh result hi kan beisei aia sang a ni. Nomawi chuh tur hian kan la inpeih tawk lo, chutihrualin ni khat atan vawi khat hmasawn a tawk," a ti.

Nipui bazar lai khan Chelsea hian player an lei hnem a, an hralh chhuak hnem bawk - club dang ṭantu ṭhenkhat chuan fiamthu thawh nan an hmang hial. Mahse, hun rei lote chhungin Maresca hian a siamṭha a, nasa takin hma an sawn.

Spurs an buai lo

Premier League table hnuai lamah an awm a, coach Ange Postecoglou chu dinhmun derthawng anga sawi a ni. Hetiang boruak karah hian Tottenham defender Cristian Romero chuan an manager chu an ṭan tlat a, an buai lo tih a sawi chhuak.

Romero chuan, "Coach ṭha tak a nihzia chu season hmasa pawh khan kan hmu tawh, kuminah hliam kan neih nual avangin thil a harsa. Kan khelh dan leh dinhmunah kan lungawi lo a nih chuan, player kan inenfiah hmasak a ngai ang," a ti.

Postecoglou hi pa luhlul leh mahni thu duh ve tak mai a ni a, goal hnih an khung hmasa an hum theih loh chungchangah pawh an naute a khelh tir ṭhin dan chu thlak danglam tumna a neih loh thu a sawi a, a kal dan pangngaia kal chhunzawm a tum.

Arsenal an chuai

Premier League nomawi an chawi hun tur an thlir a, an champion hun tur hi tun season ni loin 'Next Season' an nghak leh dawn pawh a ni mai thei - Fulham nen 1-1 a inhnehtawkin point khat an sual chhuak hram.

Craven Cottage-a inkhelah Fulham tana striker Raul Jimenez-a goal khung chu defender William Saliba-a'n a sut a, hun tawp dawna Bukayo Saka goal khung chu VAR hman a nih hnuah Gabriel Martinelli a lo offside avangin hnawlsak a ni.

Arsenal manager Mikel Arteta chuan, "Hnehna chan tumin theihtawp takmeuh kan chhuah a, kan tih theih ang zawng zawng chu kan ti kim a ni ber mai, kan chak zawh lohna kha sihsen tiat chauh a ni," tiin a sawi a, chak phu zawk an nih thu a sawi bawk.

Gunners hian nipui bazar laiin striker an lei lo a, striker atan chher chawp Kai Havertz chu tlarhma laiah a awm ṭhin - inkhel ṭhenkhatah goal khung thei viau mah se, goal khung harsatna an ngah a, an tuar zauh zauh - a tawpah champion lohna tham a ni thei.

Arteta chuan, "Set piece kan hmang ṭangkai ṭhin a, thil lawmawm leh hlu tak a ni, hei chauh erawh a tawk zo lo, hmun dang aṭang pawhin goal kan khung tur a ni," a ti a, tlarhma lamin zir tur an la nei tih a ni a, Nilaini zana AS Monaco nen Champions League an khelh hmain insiamṭhat an tum ang.