Melbuk hnehin Kolasib-in final an thleng

GIG Motors All Mizoram Inter Village Football semifinal-ah Kolasib Town Jt chuan nimin khan Melbuk 3-1 in an hneh a; coach Lalchhuansanga hote tan Isaak Malsawmkima, PC Pazawna leh RM Zothansanga ten an khung. Final hi December 12, Ningani zan hian RG Stadium-ah khelh a ni ang.

Nizan khan semifinal hnuhnung zawkah Tlangnuam leh Ramhlun North te an inkhel a, result kan hre hman lo. Tun ṭum inelnaah hian champion-in nuai hnih leh sial an dawng dawn a; best player, top scorer leh fair play thlan a ni bawk dawn.

A goal hma

Kolasib-in semifinal thleng turin football hmuhnawm an khel a, Melbuk lakah pawh chak tura rinkai an ni. Beisei lawk angin Kolasib-in bul an ṭan ṭha a, Paul Ramfangzauva hoin passing game mawi tak an khel nghal.

Minute lina lekah Kolasib-in goal an khung a, Melbuk tlarhnung ṭhiat turin player-ten an theihna sang tak an lantir. Paul-a'n anmahni lam box pawn aṭangin dinglam kilah ball a vawrh phei a, William Lalnunfela'n amah vengtu nek perin ball a chan bakah hun thawl a insiam bawk. Dinglam aṭangin William hian a laiah ball pe pheiin MS Dawngzuala'n mual laiah a chang a, ani hian amah thlawptu Isaak Malsawmkima a pe leh nghal. Mizoram winger hian ṭha zetin a pet goal.

Melbuk tlarhmaa awm Lallawmsanga ten Kolasib tlarhnung tan buaina an siam thei meuh lo a, chutihrualin Kolasib pawh an fimkhur tho avangin Melbuk tlarhnung an rum ṭhaih tam bik lo.

Minute 40-naah Stephen Lalrinfela'n halfway line thlen hma aṭangin freekick a vawrh lut a, Melbuk defender Ephraim Lalremtluanga'n a chhutsual. Box chhungah MS Dawngzuala'n ball changin goalkeeper chauh hmachhawn tawh mah se mahni hma sial loin PC Pazawna a pe a, Aizawl FC forward hian goal ruakah a khung.

A goal belh

Melbuk-in second half si phurh sut tumin ṭan khawh mah se Kolasib chu team ṭha zawk an la ni fan a, goal erawh hmuh tur a awm mai lo. Minute 87-naah RM Zothansanga'n throw in aṭanga a ball hmuh chu khalh lut nghalin goal-ah a pet a, keeper Malsawmtluanga'n a dang thei lo.

Kolasib-in quarterfinal-a BVT laka an thun zat tho Melbuk lamah an khung a, mah se a vawi khat nan goal an chhuah zui. Minute 88-naah mual vei lam aṭangin Ephraim Lalremtluanga'n angle zim tak aṭangin a khung a, keeper H. Lalrinzuala'n a hna a thawk tawk lo.

Hun tawp hmain Melbukin corner an hmu a, goalkeeper chawpin an chhuak. Kolasib-in vaw let mah se Zotea'n pet mai aiin khalh a thlang a, an pet thluk bawk si avangin hun ṭha a bawhpelh. Inkhel boruak erawh a ṭang chhunzawm a, Melbuk defender Ephraim a chet mawi loh avangin hnawhchhuah a ni.

Kolasib-in an phu angin 3-1 in hnehna an chang a, final thleng turin harsatna an la tawk lo. Coach Lalchhuansanga hote hian tun inelnaah goal 37 khung tawhin goal khat chiah an la chhuah a, an chet ṭhat em avangin final-ah pawh chak tura rinkai an ni ang.